लन्डन : अमेरिकी राष्ट्रपति डोनल्ड ट्रम्पको बेलायत भ्रमण अन्योलमा परेको छ । बेलायतकी महारानी एलिजाबेथ द्वितीयाले बुधबार बेलायती संसद्मा यसबारे कुनै पनि उचचारण नगरेपछि यस्तो अवस्था सिर्जना भएको हो ।
यस वर्षको अन्त्यमा अमेरिकी राष्ट्रपति डोनल्ड ट्रम्पले बेलायतको औपचारिक भ्रमण गर्ने कार्यक्रम रहेकोमा थियो । राष्ट्रपति ट्रम्पको बेलायत भ्रमण होस् भन्ने पक्षमा सर्वसाधारण नरहेका तथ्य सञ्चारमाध्यमले यसअघि नै खुलासा गरिसकेका थिए । ट्रम्पको बेलायत भ्रमणको विषयलाई लिएर गरिएको एक लिखित र सार्वजनिक सर्वेक्षणमा उनको भ्रमण रद्द गराउन माग गर्दै १८ लाख व्यक्तिले सही गरेका थिए ।
शाहजादा फिलिप अस्पतालमा
बेलायती शाहजादा तथा ड्युक अफ एडिनबराका नामबाट विश्वमा परिचित तथा महारानी एलिजाबेथ द्वितीयाकी पति ९६ वर्षीय फिलिप अस्पताल भर्ना भएका छन् । शरीरमा संक्रमण भएका कारण पूर्वसावधानी अपनाउन र आवश्यक उपचारका लागि उनलाई लन्डनको किङ एडवार्ड सातौँ नामक स्थानीय अस्पतालमा भर्ना गरिएको बकिङम राजप्रासादले बुधबार जानकारी दिएको छ । पहिलेको तुलनामा उनको स्वास्थ्यमा संक्रमण बढेको पाइएपछि उनलाई अस्पताल भर्ना गरिएको दरबार स्रोतले जानकारी दिएको छ । युवराज फिलिपले यसै वर्षको अन्त्यसम्म आफूले वहन गरिरहेको सार्वजनिक दायित्वबाट मुक्त हुने घोषणा गरिसकेका छन्।
प्रतिक्रिया दिनुहोस !
