भारत प्रशासित काश्मिरमा हिंसा, तीनको मृत्यु
काश्मिर : भारत प्रशासित काश्मिरमा बिहीबार बिहानै सुरक्षा फौजसँग हतियारधारी समूहको भीषण भिडन्त भएको समाचार छ । सो भिडन्तमा परी कम्तीमा पनि तीन जना हतियारधारीको ज्यान गएको छ । थुप्रै घाइते भएका र दर्जनौँ सशस्त्र व्यक्ति भागेको जनाइएको छ ।
भारत प्रशासित काश्मिरबाट पछिल्ला केही दिनयता तनाव बढेको बताइएको छ । यस क्रममा केही दिनयतादेखि हतियारधारी समूहका व्यक्ति र भारतीय सुरक्षाकर्मीबीच दोहोरो गोली हानाहानका घटना बढेका छन् ।
भारत प्रशासित काश्मिरको पुल्वामा जिल्लाको काकापोला गाउँमा बिहीबार बिहानीपख गस्तीमा खटिएका सरकारी सुरक्षाकर्मीहरुसँग व्यापक भिडन्त भएको भारतीय प्रहरीले जानकारी दिएको छ । प्रहरीका अुनसार सो भिडन्तका कारण घाइते भएका केहीलाई प्रहरीले नियन्त्रणमा लिएर अस्पताल भर्ना गरेको छ ।
मारिनेमा हतियारधारीहरु लस्कर ए तोएबा नामक सशस्त्र संगठनमा आबद्ध रहेका बताइएको छ । यसअघि पनि गतहप्ता मात्र सोही क्षेत्रमा भएको यस्तै भिडन्तमा परी उक्त संगठनका एकजना कमाण्डरको ज्यान गएको भारतीय प्रहरीले जनाएको थियो ।
श्रीनगरबाट करिब ५० किलोमिटर दक्षिणमा पर्ने सो गाउँमा गस्तीमा रहेको भारतीय सेना र प्रहरीको संयुक्त टोलीमाथि गोली चलाइएको थियो ।
रासस/एएफपी
प्रतिक्रिया दिनुहोस !
