कांग्रेसले जिते मात्रै सुदूरपश्चिम समृद्ध बन्छ: प्रम देउवा
धनगढी : प्रधानमन्त्री एवम् नेपाली कांग्रेसका सभापति शेरबहादुर देउवाले कांग्रेसले जितेमा मात्रै देश समृद्धितिर जाने बताउनुभएको छ । काग्रेसले शुक्रबार धनगढीको क्याम्पसचोकमा आयोजना गरेको चुनावी सभालाई सम्बोधन गर्दै प्रधानमन्त्री देउवाले कांग्रेसबाहेक अरुले देश विकास नगर्ने बताउनुभएको हो ।
उहाँले दोस्रो चरणको निर्वाचनमा काँग्रेस एक नम्बरको पार्टी बन्ने दावी गर्नुभयो । सुदूरपश्चिम विकासका दृष्टिले पछाडि परेकाले अब काँग्रेसले जिते मात्रै सुदूरपश्चिमको विकास हुने उहाँको भनाई थियो ।
यसअघि कैलालीको गेटामा निर्माण भईरहेको मेडिकल कलेजको निर्माण रोक्न देउवाले चलखेल गरेको समाचारको खण्डन गर्दै प्रधानमन्त्री देउवाले आफु तीन वर्षभित्र मेडिकल कलेजको निर्माण गर्ने पक्षमा रहेको बताउनुभयो । धनगढीमा काँग्रेसले जिते नेपालमै उपमहानगरपालिकाको मेयर दलित हुने ईतिहास लेखिने पनि देउवाले बताउनुभयो ।
काँग्रेसले धनगढी उपमहानगरका लागि नृपबहादुर ओड र उपमेयरमा शुसीला मिश्र भट्टलाई उमेदवार बनाएको छ । देउवाले कैलालीको क्याम्पस रोड र फुलबारीमा चुनावी सभालाई सम्बोधन गर्नुभएको थियो । फुलबारीमा गरिएको चुनावी सभामा भने माओवादी केन्द्र र काँगेसले फरक फरक समयमा एउटै मञ्चको प्रयोग गरेका थिए ।
प्रतिक्रिया दिनुहोस !
