अन्तर्राष्ट्रिय पदक ल्याउने खेलाडी सम्मानित
भक्तपुर : अन्तर्राष्ट्रिय प्रतियोगितामा पदक ल्याउन सफल भक्तपुरका चारजना खेलाडी सम्मानित भएका छन्। जिल्ला खेलकुद विकास समिति भक्तपुरले २०७४ सालभित्र भएका अन्तर्राष्ट्रिय प्रतियोगितामा सहभागी भई पदक जित्ने यहाँका चारजना खेलाडीहरुलाई सम्मान गरेको हो।
यसरी सम्मानित हुने खेलाडीहरुमा टेबुलटेनिसका नेपाल च्याम्पियन शिवसुन्दर गोथे, एथ्लेटिक्स खेलाडीद्वय कान्छीमाया कोजू र कृष्णेश्वरी सिन्ताकल तथा तेक्वान्दो खेलाडी नम्रता तण्डुकार रहेका छन्।
उनीहरुलाई भक्तपुरका प्रमुख जिल्ला अधिकारी द्रोण पोखरेलले ट्रयाकसुट, जुत्तालगायत सम्मानपत्रले सम्मान गरेका थिए।
उक्त अवसरमा प्रमुख जिल्ला अधिकारी पोखरेलले व्यक्तिको शारीरिक तथा मानसिक विकास सँगसँगै राष्ट्रिय र अन्तर्राष्ट्रियस्तरमा देशको प्रतिष्ठा बढ्ने खेललाई विद्यालय तहदेखि नै जोड दिनुपर्ने बताए।
सम्मानित खेलाडीहरुको तर्फबाट टेबुलटेनिसका नेपाल च्याम्पियन शिवसुन्दर गोथेले खेलाडीहरुको वर्षौंदेखिको मेहनत र परिश्रम एउटा दुर्घटना वा रोगको कारण सकिने बताउँदै खेलाडीहरुको उपचारको लागि कोषको व्यवस्था गर्नुपर्ने धारणा राखे। बाँच्ने आधार नपाउँदा धेरै प्रतिभावान खेलाडीहरुले खेल जीवनबाटै विस्थापित हुनुपर्ने उनको भनाइ थियो।
समितिका अध्यक्ष दिलीप केसीले खेलाडीलाई निरन्तर खेलमा लाग्ने हौसला प्रदान गर्न सम्मान गरिएको जानकारी दिए। उनले खेलकुद र खेलाडीलाई प्राथमिकतामा राख्न सम्बन्धित निकाय र सरकारको ध्यानाकर्षण गर्दै आएको बताए।
प्रतिक्रिया दिनुहोस !
