प्रमुख प्रशिक्षक जोशीको निधन

काठमाडौं : ओलम्पियन तथा भारोत्तोलनका प्रमुख प्रशिक्षक सुनीललाल जोशीको ५३ वर्षको उमेरमा निधन भएको छ । गत साता हृदयाघात भई बाँसबारीस्थित गंगालाल राष्ट्रिय हृदयरोग अस्पतालमा भर्ना गरिएका जोशीको आइतबार बिहान निधन भएको हो । सन् १९९६ मा अमेरिकाको एटलान्टामा भएको २६औं गृष्मकालीन ओलम्पिक खेलकुदमा सहभागी भएका जोशी दक्षिण एसियाली खेलकुदमा सबैभन्दा बढी पदक जित्ने खेलाडी हुन् ।

नेपाल ओलम्पियन संघका अध्यक्षसमेत रहेका जोशीले २०४१ सालमा काठमाडौंमा आयोजना भएको प्रथम दक्षिण एशियली खेलकुद (साफ) मा सहभागिता जनाउँदै रजत पदक पनि प्राप्त गरेका थिए । दक्षिण एसियाली खेलकुदको प्रथम संस्करणदेखि सातौं संस्करणसम्म प्रतिस्पर्धा गरेका जोशीले ६ रजत र ११ वटा कांस्य पदक जितेका छन् ।

नेपाल भारोत्तोलन संघका उपाध्यक्षसमेत रहेका जोशीले सक्रिय खेल जीवनबाट सन्न्यास लिएपछि २०५२ साल असोज १ गतेबाट राष्ट्रिय खेलकुद परिषद् (राखेप) मा जागिरे जीवन सुरु गरेका थिए । सुरुमा प्रशिक्षकका रूपमा राखेपमा आबद्ध भएका जोशी २०६३ साल पुस २१ गते वरिष्ठ भारोत्तोलन प्रशिक्षकमा बढुवा भएका थिए । उनी २०६९ सालदेखि भारोत्तोलनका प्रमुख प्रशिक्षक थिए ।

उनको पार्थिव शरीर त्रिपुरेश्वरस्थित राखेपको परिसरमा श्रद्धाञ्जलिका लागि राखिएको थियो । युवा तथा खेलकुद मन्त्रालयका निमित्त सचिव ज्ञानराज सुवेदी, परिषद्का उपाध्यक्ष लामाटेन्डी शेर्पा, राखेपका पूर्वसदस्यसचिव जीवनराम श्रेष्ठ, नेपाल राष्ट्रिय तथा अन्तर्राष्ट्रिय खेलाडी संघका पदाधिकारी, ओलम्पियन, खेलाडी, खेलकर्मी, राखेपका कर्मचारी र आफन्तजनले स्व.जोशीप्रति श्रद्धाञ्जलि अर्पण गरेका थिए । जोशीको आइतबार नै पशुपति आर्यघाटमा अन्तिम संस्कार गरिएको थियो । जोशीका श्रीमती र एक छोरा छन् ।

को हुन जोशी ?

-भारोत्तोलनका प्रमुख प्रशिक्षक थिए, सुनीललाल जोशी ।
-दक्षिण एसियाली खेलकुदको पहिलोदेखि सातौं संस्करणसम्म सहभागी ।
-सन् १९९६ मा अमेरिकाको एटलान्टामा भएको २६औं गृष्मकालीन ओलम्पिकमा सहभागी ।
-२०५२ साल असोज १ गतेबाट राखेपमा प्रशिक्षकका रूपमा जागिरे जीवन सुरु ।
-गत साता हृदयाघात भई अस्पताल भर्ना गरिएका जोशीको उपचारका क्रममा आइतबार बिहान निधन ।