काठमाडौं: टुरिजम डेभलपमेन्ट बैंक लिमिटेडले प्रविधिमा आधारित थप बैंकिङ सेवासुविधा विस्तार गरेको छ । विद्यमान सेवा सुविधालाई परिष्कृत, अत्याधुनिक, विश्वसनीय, प्रविधिमैत्री एवं पहुँंचयोग्य बनाउन बैंकले आफ्नो सेवा विस्तार गरेको हो ।
बैंकले ईएमभी चिप प्रविधिमा आधारित भिसा डेबिट कार्ड यूएस डलर कार्ड अन्तर्राष्ट्रिय ट्राभल कार्ड जारी गरेको छ । यी कार्ड विश्वव्यापी रूपमा प्रयोग गर्न सकिने अत्याधुनिक ईएमभी चिप प्रविधिमा आधारित भएकाले धेरै सुरक्षित छन् । भिसा डेबिट कार्ड नेपाल र भारतका एक लाखभन्दा बढी एटीएममा चल्नेछ । भिसा अन्तर्राष्ट्रिय ट्राभल कार्डमार्फत विश्वको जुनसुकै ठाउँबाट त्यहाँको स्थानीय मुद्रामा पैसा निकाल्न र भुक्तानी गर्न सकिने बैंकले जनाएको छ ।
यसका साथै बैंकले स्मार्ट मोबाइल बैंकिङ सेवा पनि सुरु गरेको छ । यस नयाँ प्रविधिको मोबाइल बैंकिङ सेवाबाट कारोबार गर्दा अझ सुरक्षित हुनुका साथै जीपीआरएस अथवा वाइफाइमार्पत विश्वको कुनै पनि ठाउँबाट कारोबार गर्न सकिने बैंकले जनाएको छ । यसमार्फत प्रयोगकर्ताले बैंकका नयाँ शाखा, खाता, सेवालगायत एटीएम सञ्जालबारे जानकारी प्राप्त गर्न सक्नेछन् । यसमार्फत अन्तर बैंक भुक्तानीका साथै वस्तु तथा सेवा खरिदबापत भुक्तानी गर्न सकिनेछ । बैंकले पोइन्ट अफ् सेल्स मेसिनसमेत सुरु गरेको जनाएको छ । उक्त मेसिन ईएमभी चिप प्रविधिमा आधारित भएकाले कारोबार सुरक्षित हुने बैंकको दाबी छ । बैंकका अनुसार उक्त नयाँ सेवाबाट व्यवसायीलाई आफ्नो व्यवसाय बढाउन मद्दत पुग्नुका साथै ग्राहकले कुनै पनि बैंकको डेबिट/क्रेडिट कार्डबाट सहज एवं सरल रूपमा कारोबार गर्न सक्नेछन् ।
बैंकले आफ्ना ग्राहकको सहजतालाई मध्यनजर गर्दै अनलाइनबाट सेयर भर्ने व्यवस्थासमेत सुरु गरेको छ । बैंकले हाल प्रदान गर्दै आएको आस्वा सेवालाई प्रभावकारी बनाउँदै ग्राहकलाई थप सुविधा दिन छिट्टै अनलाइनबाट सेयर भर्ने व्यवस्था गर्ने जनाएको हो । यसका साथै बैंकले आठ नयाँ शाखा तथा पाँचवटा थप एक्सटेन्सन काउन्टर सञ्चालनमा ल्याउने योजना बनाएको छ भने वित्तीय पहुँच नभएका केही स्थानमा शाखारहित बैंकिङ सेवासमेत सुरु गर्ने योजना बनाएको बैंकले जानकारी दिएको छ । साथै बैंकले कानुनको परिधिभित्र रहेर वैदेशिक लगानीकर्ताका लागि परामर्श सेवा सुरु गर्ने योजना बनाएको छ । यसका लागि बैंकले जापानी लगानीकर्तासँग छलफल गरिरहेको जनाएको छ ।
प्रतिक्रिया दिनुहोस !
