काठमाडौं : गुराँस लाइफ इन्सुरेन्स कम्पनी लिमिटेडले आफ्ना सेयरधनीलाई आठ प्रतिशतका दरले बोनस सेयर प्रदान गर्ने भएको छ । शुक्रबार सम्पन्न कम्पनीको आर्थिक वर्ष २०७१/०७२ र आर्थिक वर्ष २०७२/०७३ को आठौं साधारणसभाले उक्त निर्णय गरेको हो ।
उक्त साधारणसभाले आव २०७३÷२०७४ का लागि लेखा परीक्षक नियुक्तिलगायत कम्पनीमा संस्थापक सञ्चालकको रिक्त चार स्थानमा विवेक दुगड, ऋषिकुमार गाडिया, शम्भुप्रसाद सुवेदी, मेघराज पौडेल र स्वतन्त्र सञ्चालकमा शिवबहादुर श्रेष्ठलाई गरिएको नियुक्ति पारित गरेको छ ।
विशेष प्रस्तावमा कम्पनीको आर्जित मुनाफाबाट हाल कायम चुक्ता पुँजीको आठ प्रतिशतका दरले बोनस सेयर जारी गर्ने प्रस्तावका साथै उक्त बोनस सेयर जारी भएपश्चात हुन आउने चुक्ता पुँजीको ५० प्रतिशत (२:१) को अनुपातमा हकप्रद सेयर जारी गर्ने प्रस्तावसमेत पारित गरेको छ । साधारणसभाले चुक्ता पुँजी वृद्धिलगायत अन्य विविध विषयमा प्रबन्धपत्र र नियमावलीमा संशोधन गर्ने जनाएको छ ।
प्रतिक्रिया दिनुहोस !
