काठमाडौं: नेपाल टेलिकम (एनटीसी) ले बागलुङ जिल्लाको उत्तर पश्चिम भेगको बिकट स्थान तमान खोलामा बीटीएस स्थापना गरी जीएसएम मोबाइल सेवा विस्तार गरेको छ ।
टेलिकमले शुक्रबारबाट उक्त स्थानमा जीएसएम मोबाइल सेवा सञ्चालनमा ल्याएको हो । टेलिकमले उपलब्ध गराएको जानकारी अनुसार उक्त स्थानमा यसअघि कुनै पनि किसिमको दूरसञ्चार सेवा पुग्न सकेको थिएन । तमानखोला गाउँपालिका वडा नम्बर ३ तमानखोलामा स्थापित बीटीएसबाट तमानखोला गाउँपालिकाको वडा नम्बर ३ र ४ का करिब ६ सय घरधुरीका वासिन्दा र खुङखानीको वडा नम्बर ६ का वासिन्दा लाभान्वित हुनेछन् ।
यो सँगै उक्त क्षेत्रका वासिन्दाले मोबाइल फोनमार्फत अन्य क्षेत्र तथा विश्व समुदायसँग सम्पर्क स्थापित गर्न सहज भएको टेलिकमले जनाएको छ । तमानखोला बागलुङ जिल्ला सदरमुकामबाट एक सय १६ किलोमिटर सडक मार्गको यात्रापश्चात करिब डेढ घन्टाको पैदलमार्गको दुरीमा छ । उक्त स्थान छिमेकी जिल्ला म्याग्दीको सिमानासंँग जोडिएको छ ।
दुर्गम तथा अति बिकट क्षेत्रका ग्रामीण तहसम्म दूरसञ्चार सेवाको पहुँच विस्तार गर्ने नेपाल सरकारको नीतिअनुसार कम्पनीले उक्त क्षेत्रमा सेवा विस्तार गरेको जनाएको छ । प्रतिफल कम आउने र तुलनात्मक रूपमा लगानी बढी हुने स्थानमा समेत समान रूपमा दूरसञ्चार सेवा विस्तार गर्ने क्रमलाई निरन्तरता दिँदै उक्त स्थानमा हालै उपकरण जडान गरी नेपाल टेलिकमले सेवा सञ्चालनमा ल्याएको हो ।
प्रतिक्रिया दिनुहोस !
