शान्तिपूर्ण रुपमा मतदान गर्ने वातावरण बनाउन अमेरीका र बेलायतको आग्रह

काठमाडौं : दोस्रो चरणको स्थानीय तहको निर्वाचनमा मतदाताहरुले शान्तिपूर्णरुपमा मतदान गर्ने वातावरण निर्माण गर्न नेपालस्थित अमेरीकन र बेलायती दुतावासले आग्रह गरेका छन् ।
सोमवार छुट्टाछुट्टै विज्ञप्तीमार्फत यी दुई देशले प्रदेश १, ५ र ७ का नागरिकहरूलाई स्थानीय जनप्रतिनिधि चुन्नका लागि शान्तिपूर्ण रूपमा आफ्नो लोकतान्त्रिक अधिकार अभ्यास गर्ने अवसर प्रदान गर्न आग्रह गरेका हुन् । अमेरीकि दुतावासद्वारा जारी विज्ञप्तीमा भनिएको छ, ‘स्थानीय तह निर्वाचनको दोस्रो चरणलाई स्वतन्त्र, स्वच्छ तथा पारदर्शी रूपमा सम्पन्न गर्नका निम्ति नेपाल सरकार, निर्वाचन आयोग, नागरिक समाज, राजनीतिक दल र नागरिक लगायत सबै सरोकारवालाहरूले गरेको प्रयत्‍नको संयुक्त राज्य अमेरिका उच्च मूल्याङ्कन गर्न चाहन्छ । निर्वाचनद्वारा नै नागरिकले आफ्नो राजनीतिक इच्छा व्यक्त गर्दछन् । यस अधिकारलाई नेपालको कानुन र संविधानका साथै मानव अधिकारको विश्‍वव्यापी घोषणाको धारा २१ मा प्रत्याभूत गरिएको छ ।’

यस्तै बेलायती दुतावासद्वारा जारी विज्ञप्तीमा शान्तिपूर्ण रुपमा मतदान गर्ने नागरिकको अधिकारको सुनिश्चिता गर्न सरोकारवाला निकायसंग आग्रह गरिएको छ । साथै सुरक्षाकर्मीलाई पनि कर्तव्य पालना गर्दा संयम अपनाउन र प्रचलित राष्ट्रिय तथा अन्तर्राष्ट्रिय मापदण्डहरूको पालना गर्न आग्रह गरिएको छ ।  
दुबै देशले शान्तिपूर्ण, समावेशी, व्यापक समर्थन(प्राप्‍त तथा विश्‍वसनीय निर्वाचन प्रक्रियाका लागि सबै सरोकारवालाहरूसँग सहकार्य गर्नका लागि प्रतिवद्ध रहेको जनाएको छन् ।