चीनले दिएको इन्डक्सन चुल्हो चार हजारमा बिक्री

काठमाडौं : नेसनल ट्रेडिङ लिमिटेडले चार हजार रुपैयाँमा १० हजार थान इन्डक्सन चुल्होको बिक्री सुरु गरेको छ । आपूर्ति मन्त्रालयले एक थान चुल्हो एक थान भाँडा सेटसहितको चार हजार मूल्यमा बिक्री गर्न सहमति दिएपछि नेसनलले बिक्री गर्न सुरु गरेको हो । 

नेसनलका महाप्रबन्धक लबराज जोशीले गत शुक्रबारदेखि टेकुस्थित केन्द्रीय कार्यालयबाट चुल्होको बिक्री गर्न सुरु गरेको जानकारी दिनुभयो ।‘आपूर्ति मन्त्रालयमार्फत अर्थबाट सहमति आएलगत्तै बिक्री सुरु ग¥यौं’, जोशीले भन्नुभयो, ‘सर्वसाधारणले चासो देखाएर खरिद गर्न आइरहनुभएको छ ।’
नाकाबन्दीको समयमा नेपाल सरकारको आग्रहमा चीन सरकारले झन्डै आठ करोड मूल्य बराबरको ११ हजार तीन सय थान इन्डक्सन चुल्हो नेपाललाई उपलब्ध गराएको थियो । चर्को मूल्यका कारण उक्त चुल्होमध्ये एक थान मात्रै तत्कालीन समयमा बिक्री भएको थियो । बाँकी ११ हजार दुई सय ९९ थान चुल्हो विमानस्थलको पारवहन तथा गोदाम कम्पनीको लिमिटेडमा थन्केर बसेको थियो । 

जोशीका अनुसार ट्रेडिङले दुइ सेट भाँडावर्तन, एक थान चुल्हो र कमिसनसहित प्रारम्भिक चरणमा ११ हजार नौ सय ९६ रुपैयाँ मूल्य तोकिएको थियो । ‘तत्कालीन समयमा इन्धनको चर्को अभाव भएको समय थियो,’ जोशीले भन्नुभयो, ‘इन्धनको अभाव भएको समयमा बिक्री हुने अपेक्षा राखिएको थियो । तर, केही दिनपछि इन्धनको अवस्था सामान्य बन्दै गयो । अर्कोतर्फ भारतबाट निकै सस्तोमा आएको चुल्होका कारण हामीले राखेको मूल्यका कारण चुल्हो बिक्री हुन सकेन ।’ 

पछिल्लो समयमा व्यवस्थापिका संसद्को उद्योग वाणिज्य तथा उपभोक्ता हित सम्बन्ध समिति र समितिअन्तर्गतको आपूर्ति तथा उपभोक्ता हित उपसमितिले अर्थ मन्त्रालय र आपूर्ति मन्त्रालयलाई तत्कालै आवश्यक गाँठो फुकाएर सस्तो मूल्यमा बिक्री गर्न निर्देशन दिएपछि अर्थको सहमतिमा आपूर्तिले उपभोक्ता बिक्री मूल्य चार हजार रुपैयाँ निर्धारण गरेको थियो । नयाँ मूल्य निर्धारणसँगै चीनले रसुवा नाकामार्फट पहिलो चरणमा उपलब्ध गराएको एक हजार तीन सय थान चुल्हो केही साताअघि बिक्री भएको थियो । दोस्रो चरणमा विमानमार्फत चीनले उपलब्ध गराएको १० हजार थान चुल्हो अहिले बिक्री गर्न सुरु गरिएको हो । नेसनलको अनुसार विमानस्थलको पारवहन तथा गोदाम कम्पनीबाट १० हजारमध्ये २८ वटा चुल्हो चोरी भएको छ ।

विमानमार्फत आएको चुल्होको मूल्य कायम गर्न अर्थ मन्त्रालयले लामो समयसम्म सहमति नदिँदा १० हजार थान विमानस्थलको गोदाममा करिब दुई वर्षसम्म थन्किएको थियो । यसरी गोदाममा लामो समयसम्म राखिँदा विलम्ब शुल्क (डेमरेज) नै डेढ करोड पुगेको थियो । सरकारले हालै उक्त शुल्क मिनाहा गरेपछि १० हजार चुल्होको बिक्री गर्ने बाटो खुलेको हो ।