'थोरै पढ्नुस्, नियमित पढ्नुस्'
परीक्षामा धेरै अंक ल्याउने नाममा दिमागलाई अनावश्यक दबाब दिन नहुने पक्षमा छिन् रोजिना अधिकारी । तर, उनले यसपटक त्रिपुरेश्वरस्थित विश्व निकेतन माध्यमिक विद्यालयबाट एसईई परीक्षामा तीन दशमलव ९० प्रतिशत अंक ल्याइन् । मुलुकभर रहेका २८ हजार सामुदायिक विद्यालयका छात्रमध्ये एसईई परीक्षामा रोजिनाले ल्याएको नतिजा उत्कृष्ट रहेको दाबी गरिरहेको छ, विद्यालयले । रोजिनाको पढ्ने तरिका र अनभुवमा आधारित रहेर गरिएको छोटो कुराकानी ।
एसईईमा यस्तो नतिजा आउँछ भन्ने अपेक्षा गर्नुभएको थियो ?
राम्रै नम्बर आउँछजस्तो त लागेको थियो । तर, यति धेरै आउला भन्ने सोचेको थिइनँ । दैनिक स्कुलमा पढेर फर्केपछि पुनः घरमा पनि दोहोर्याएर पढ्ने बानी थियो, जसले मलाई राम्रो नतिजाको अपेक्षा गर्न बल पुर्याएको थियो ।
के कारणले परीक्षामा उत्कृष्ट नतिजा आयो ?
पढाइमा कहिल्यै पनि दिमागलाई दबाब दिनु हुँदैन भन्ने पक्षमा म छु । जति दबाब दियो उति धेरै पढ्न गाह्रो हुने मेरो अनुभव छ । यही सोचेर मैले परीक्षाभन्दा दुईतीन महिना अघिदेखि नै तयारी गरिरहेको थिएँ । पहिलादेखि नै तयारी गर्यो भने राम्रो नम्बर ल्याउन समस्या हुँदैन । यसैको परिणाम हो, एसईईमा आएको नतिजा ।
दैनिक कति घन्टा पढ्ने गर्नुहुन्थ्यो ?
म पढाइमा त्यति धेरै समय दिन्नँ । हरेक दिन १० बजेसम्म मात्र पढ्ने गर्छु । र बिहान साढे ४ बजेतिर उठ्छु । त्यसबाहेक स्कुलमा बिहान ७ बजेदेखि ५ बजेसम्म पढाइ हुन्थ्यो । जति समय पढाइका लागि दिन्छु, त्यो समय राम्रोसँग सदुपयोग गर्छु । मेरा बुझाइमा विद्यार्थीले समयको व्यवस्थापन गर्न जान्नुपर्छ । जुन काम मैले गरिरहेको छु जस्तो लाग्छ ।
राम्रो नतिजा आउनुमा कसको भूमिका कति छ जस्तो लाग्छ ?
हरेक विद्यार्थीले राम्रो नतिजाका लागि आफैंले परि श्रम गर्नुपर्छ । त्यसपछि बालबालिकाको उचित शिक्षाका लागि अभिभावकले पनि महत्वपूर्ण भूमिका खेल्नुपर्छ र बालबालिकालाई पढ्ने वातावरण मिलाइदिनुपर्छ । मलाई पनि पढ्ने क्रममा बाआमाले कहिल्यै नाइँ भन्नुभएन । त्यसबाहेक अभिभावकले जस्तै शिक्षकशिक्षिकाको हात पनि ठूलो हुन्छ उचित बाटो देखाउनलाई ।
अघिल्ला कक्षाहरूमा पनि यस्तै राम्रो नतिजा आउँथ्यो ?
म अन्य कक्षाहरूमा पनि दोस्रो र तेस्रो स्थानमा रहन्थेँ । कक्षामा नबुझेको कुरा सोध्न लाज लाग्दैनथ्यो । यस विषयमा मलाई स्कुलका प्राचार्य हेरम्बराज कँडेलले निकै प्रेरणा दिनुहुन्थ्यो ।
सरकारी र निजी विद्यालयको पढाइमा के भिन्नता रहेछ ?
मैले कक्षा ७ सम्म कलंकीस्थित एलआरआई स्कुलमा पढेँ । मेरो अनुभवमा सरकारी र बोर्डिङ स्कुलको पढाइमा कुनै फरक छैन । दुवै ठाउँमा उत्तिकै मेहनत गर्नुपर्छ । पढाइलेखाइका विधिहरू उस्तै हुन् । आममान्छेहरू बोर्डिङ स्कुल राम्रो भन्छन्, जुन सोचाइ गलत रहेको मैले विशव निकेतन भर्ना भएपछि थाहा पाएँ।
अब कहाँ पढ्ने ? कुन विषय पढ्ने ?
कक्षा ११ म विश्व निकेतनमै पढ्छु । बायोलोजी लिएर विज्ञान विषय पढ्ने योजना बनाएको छु । यसपछि एमबीबीएस पढ्ने योजना छ । बीचैमा योजना परिवर्तन भयो भने बायोकेमेस्ट्री विषय अध्ययन गर्ने विकल्प रोजेको छु ।
परीक्षाको तयारी गरिरहेका वा पढिरहेका भाइबहिनीहरूलाई केही सुझाव दिनुहुन्छ ?
म अझै पनि भन्छु, कोही विद्यार्थी परीक्षाको तयारी गर्दै वा पढ्दै हुनुहुन्छ भने दिमागलाई स्वतन्त्र छोडेर पढाइमा लाग्नुस् । दिमागलाई अनावश्यक दबाब दिएर, घोकेर ल्याएको नम्बरको अर्थ रहँदैन । बरु थोरै समय पढ्नुस् तर नियमित पढ्नुस् । समय खेर नफाल्नुस्, तपाईंसँग भएको समयलाई रचनात्मक काममा प्रयोग गर्नुस् ।
प्रस्तुति : नितु घले