हारेपनि हाम्रो औचित्य सकिएको छैन: थापा
हेटौंडाः राष्ट्रिय प्रजातन्त्र पार्टीका अध्यक्ष कमल थापाले विदेशी शक्तिहरु राप्रपालाई कमजोर बनाउन सक्रिय रहेको आरोप लगाउनुभएको छ । विदेशी शक्तिहरुकै कारण राप्रपाले पहिलो चरणको स्थानीय तहको चुनावमा अप्रत्याशीत पराजय भोग्नुपरेको बताउनुभयो ।
गृहनगर हेटौंडामा मंगलबार जिल्ला कार्यकर्ता भेलालाई सम्बोधन गर्दै उहाँले भन्नुभयो, ‘नेपालको सनातन धर्म र राष्ट्रिय अखण्डता कमजोर बनाउन राप्रपालाई हराउने खेलमा विदेशी शक्ति लागेको छ ।' स्थानीय निकायको पहिलो चरणको निर्वाचमा अप्रत्याशित हार ब्यहोरे पनि राप्रपाको औचित्य समाप्त नभएको उहाँको भनाई छ ।
‘हामीले लिएको एजेण्डा र अडानका कारण राप्रपाको औचित्य बढ्दै गएको छ',उहाँले भन्नुभयो, ‘राप्रपा अब उग्र रुपमा आउनेछ ।'पार्टी एकीकरणपछि संगठन तल्लो तहसम्म पुग्न नपाउँदै निर्वाचनमा होमिनुपरेकाले पनि निर्वाचनमा हार ब्यहोर्नुपरेको उहाँको भनाई छ ।
अध्यक्ष थापाले लोकतन्त्रको आडमा ठूला तीन दलको सिण्डिकेट हाबी भएको आरोप लगाउनुभयो । ‘जनताले लोकतन्त्रको अनुभूति गर्न पाएका छैनन्',उहाँले भन्नुभयो, ‘भागबण्डामा तीनै दल मिलेका छन्, देखाउनलाई बेलाबखत बिरोध गर्छन् ।'
प्रतिक्रिया दिनुहोस !
