काठमाडौं : संगीतकार दिव्य खालिङको ११औं स्मृति दिवसका अवसरमा उनका गीत गाएर सम्मान तथा स्मरण गरिएको छ । गायिकाद्वय एन्जिलासिं श्रेष्ठ र आभा मुकारुङले एउटा गीत प्रस्तुत गर्दा वातावरण संगीतमय बन्यो । धेरैले दिव्यलाई सम्झिए ।
परेलीले पन्छाउला काँडा निर्मोही कुल्चने बाटोमापाउको माटो सिउँदोमा राखी सिँगारुँला सिन्दूरको साटोमा ।
अलग आर्ट हबले आयोजना गरेको सांगीतिक कार्यक्रममा एन्जिला र आभाका साथै मण्डल साम्पाङ, गीता पाण्डे, सुनिता थेगिम, विनोद बान्तवा, कर्ण लामा, सुनिता राई, विक्रम योञ्जनलगायत आर्ट हबका विद्यार्थीले गीत प्रस्तुत गरेका थिए ।
उनीहरूले खालिङका चर्चित गीत ‘बिर्सिएर मैले फेरि', ‘तिमीलाई भुल्दा', ‘उड्दै आयो चिठी चरी', ‘तिमी मान या नमान', ‘मेरा गीत सबै तिमीलाई', ‘म त लालीगुराँस भएछु', ‘जता हेर्यो उतै तान्ने' बोलका गीत सुनाएका थिए । उनीहरुलाई मण्डल साम्पाङ, यमकुमार समाल, नाकिम र विक्रम योञ्जनले वाद्यवादनमा साथ दिएका थिए ।
कार्यक्रममा गायिका आभा मुकारुङले दिव्य खालिङ नेपाली संगीतको पाठशालाजस्तै भएको बताइन् । स्रष्टा खालिङसँग संगत गरेकी गायिका एन्जिलाले दिव्य खालिङका धेरै सिर्जना गुमनाम अवस्थामा रहेकाले अलग आर्ट हबजस्ता संस्थाले खोजी गरेर श्रोतामाझ ल्याउनुपर्ने बताइन् । नाकिमा नाकिमले अग्रज स्रष्टाले बनाएको सांगीतिक गोरेटोलाई फराकिलो बनाउँदै अघि बढ्ने जिम्मेवारी नयाँ पुस्तामा आएको बताए ।
प्रतिक्रिया दिनुहोस !
