काठमाडौँ : काठमाडौं महानगरपालिकाका जेष्ठ सदस्यले अब घरमै स्वास्थ्य सेवा पाउने भएका छन् । ८८ वर्ष उमेर पुगेका महानगरका जेष्ठ नागरिकले घरघरमै स्वास्थ्य सेवा पाउने भएका हुन् । काठमाडौँ महानगरपालिकाले ‘टोलटोलमा जेष्ठ नागरिक, घरघरमा स्वास्थ्य सेवा' अभियान सुरु गर्दै जनताको घरदैलोमा पुगेपछि नगरवासीहरु उत्साहित भएका छन् ।
काठमाडौं महानगरपालिकाका मेयर विद्यासुन्दर शाक्यले ८८ वर्ष उमेर पूरा भएका महानगरका जेष्ठ नागरिकलाई लक्षित गरेर महानगरले ‘टोलटोलमा जेष्ठ नागरिक, घरघरमा स्वास्थ्य सेवा' अभियान सुरु गरेको बताउनुभयो । अभियानको सुरुवात गर्दै मेयर शाक्य र उपमेयर हरिप्रभा खड्गीसहितको टोली महानगरपालिकाकै वडा नं. १ नक्साल क्षेत्रमा बिहीबार पुगेका थिए ।
वृद्ववृद्वाले २० वर्षपछि भएको स्थानीय निर्वाचनबाट निर्वाचित जनप्रतिनिधि आफ्नो घरदैलोमै आएर स्वस्थ्य जीवनका लागि सहयोग गर्दा खुसी भएको बताए । मेयर शाक्यले आफू जनप्रतिनिधि भएका नाताले सदैव आफ्नो ध्यान जनप्रतिनिधिको सेवामै समर्पित हुने बताउनुभयो । काठमाडौं महानगरपालिका क्षेत्रभित्र रहेका जेष्ठ नागरिकलाई जीवनप्रति सकारात्मक एवं रोगको निदान गर्ने उद्देश्यले अभियान सुरु गरिएको र प्रभावकारी ढंगले सबै जेष्ठ सदस्यमाझँ पुग्ने उहाँको भनाई थियो ।
‘हामीले आजकै दिनदेखि काठमाडौं महानगरपालिकाकै वडा नं. १ नक्साल क्षेत्रबाट जेष्ठ नागरिक सामाजिक सुरक्षा भत्ता वितरण एवं नागरिकको घरमै गएर स्वास्थ्य परीक्षण कार्यक्रम सुरु गरेका छौँ ।'उहाँले भन्नुभयो । ८८ वर्ष उमेर पूरा भएका महानगरमा ५ सय ९६ जना छन् । स्वास्थ्य परीक्षणका क्रममा डाक्टर स्टाफ नर्स, एएनएम (अनमि)र एएचडव्लु (अहेव) १/१ जना रहने महानगरले जानकारी दिएको छ । महानगर भित्रका सबै वडामा अब यस्ता कार्यक्रम लिएर जाने शाक्यले बताउनुभयो ।
प्रतिक्रिया दिनुहोस !
