काठमाडौं ः हिमालयन बैंक लिमिटेडले मैतीदेवी मन्दिर परिसरमा सीसीटीभी क्यामेरा जडान गरेको छ । बैंकले ऐतिहासिक एवं धार्मिक सम्पदाको सुरक्षामा सहयोग पुर्याउने उद्देश्यले काठमाडौं महानगरपालिका वडा नम्बर ३० मा रहेको मैतीदेवी मन्दिर वरिपरिको विभिन्न आठ स्थान उच्च क्षमता युक्त सीसीटीभी क्यामेरा जडान गरेको छ । जडानका साथै सोसम्बन्धी रेकर्डिङ उपकरण एक समारोहबीच हस्तान्तरण गरिएको बैंकले जनाएको छ । उक्त रेकर्डिङ उपकरणले उच्च क्षमतामा १८ दिनसम्मको चौबिसै घन्टाको गतिविधिलाई सुरक्षित राख्न सक्नेछ ।
यस अवसरमा बैंकका अध्यक्ष मनोजबहादुर श्रेष्ठले सीसीटीभीसम्बन्धी उपकरण मैतीदेवी क्षेत्र प्रबन्ध समितिका सदस्य सचिव दर्शन महतोलाई औपचारिक रूपमा हस्तान्तरण गर्नुभएको हो । समारोहमा पुरातत्व विभागका महानिर्देशक भेषनारायण दाहाल, बैंकका सञ्चालक, बैंकका वरिष्ठ पदाधिकारी तथा मैतीदेवी क्षेत्र प्रबन्ध समितिका अन्य पदाधिकारीको समेत उपस्थिति थियो । समारोहमा मन्तव्य व्यक्त गर्दै अध्यक्ष श्रेष्ठले सीसीटीभी जडान भएपछि मन्दिर परिसर वरिपरि हुन सक्ने विभिन्न गतिविधि नियन्त्रणमा सहयोग पुग्ने बताउनुभयो ।
यसैगरी, पुरातत्व विभागका महानिर्देशक भेषनारायण दाहालले बैंकको यसप्रकारको पुरातात्विक सम्पदा संरक्षण कार्य अत्यन्त सराहनीय रहेको बताउनु भयो । यसअघि पनि बैंकका अध्यक्ष मनोजबहादुर श्रेष्ठले बैंक तथा व्यक्तिगत एवं पारिवारिक सहयोगमा मैतीदेवी मन्दिरमा तोरण एवं ढलोटका दुई सिंह प्रतिमा स्थापना गरिसकेको जानकारी गराउनुभयो ।
प्रतिक्रिया दिनुहोस !
