सिमरा : जीतपुरसिमरा उपमहानगर १५ डुमरवानास्थित रक्तक्यान्सरपीडित डेढ वर्षीया बालिका सुहाना सापकोटालाई शुक्रबार एक कार्यक्रमको आयोजना गरी दुई लाख १८ हजार रुपैया हस्तान्तरण गरिएको छ ।
सुहाना बचाउ अभियानका प्रमुख अभियन्ता डा. कृष्ण पौडेलले बालिकाकी हजुरबुवा भरत सापकोटालाई हस्तान्तरण गर्नुभएको हो । रकम हस्तान्तरणपछि बोल्दै सहकारी तथा सामाजिक अभियन्तासमेत रहेका डा. पौडेलले अवोध बालिकाको जीवनरक्षाका लागि आफुहरुले चलाएको सर्वपक्षीय सहयोग संकलन सफल भएको बताउनुभयो ।
भरतपुर क्यान्सर अस्पतालमा उपचारार्थ रहेकी सुहानाको स्वास्थ्य र परिवारको आर्थिक अवस्थाले यो अभियानमा लाग्न उत्प्रेरित गरेको बताउदै डा. पौडेलले दाताको उत्साहजनक सहयोग रहेको बताउनुभयो ।
सुहानाकी हजुरबुवा भरत सापकोटाले नातिनीको उपचारका लागि अभियन्ताहरुले देखाएको आर्थिक सहयोग संकलनले आफुहरु प्रभावित भएको बताउदै उपचारका लागि आवश्यक रकम समुदायले नै जुटाइदिएकोमा हर्ष प्रकट गर्नुभयो ।
स्थानीयको सहयोगले आफनो छोरीलाई उपचार खर्च जुटाउन सकिने आधार बनेको सुहानाकी बुवा शुदर्शन सापकोटाले बताउनुभयो । अचानक पेट फुलेर उपचार गर्दा गम्भीर देखिएपछि काठमाडौंस्थित कान्ति बाल अस्पतालमा पुर्याइएको र रक्तक्यान्सर भएको पत्ता लागेको थियो । कान्ति बाल अस्पतालले रिफर गरेपछि थप उपचारका लागि नयाँदिल्लीस्थित गंगाराम अस्पतालमा पाँच दिन उपचारपछि अहिले भरतपुर क्यान्सर अस्पतालमा उपचार भइरहेको छ । नयाँदिल्लीमा उपचार अत्यन्त महंगो भएको आफूसँग उपचार गर्न सम्भव नहुने देखेपछि नेपाल फर्किएको आमा शर्मिला सापकोटाले बताउनुभयो ।
सुहाना बचाउ अभियानको क्रममा हालसम्म विभिन्न तवरबाट करीव चार लाख संकलन भइसकेको छ र उनको उपचारका लागि १५ लाख रुपैया लाग्ने अनुमान गरिएको छ । काठमाडौंको कान्ती बालअस्पताल र नयाँदिल्लीस्थित गंगाराम अस्पतालमा सघन उपचारपछि हाल सुहानाको भरतपुर क्यान्सर अस्पतालमा उपचार भइरहेको छ ।
हातेमालो सहकारीले ३७ हजार
यस्तै सिमरास्थित हातेमालो बचत तथा ऋण सहकारी संस्थाले ३७ हजार रुपैयाँ सुहानाको उपचारका लागि सहयोेग गर्ने भएको छ । हातेमालो सहकारीका संस्थागत र सञ्चालक तथा कर्मचारीले व्यक्तिगत रुपमा उक्त सहयोग गर्ने भएका हुन् । संस्थाका अध्यक्ष डा. कृष्ण पौडेलले सुहाना बचनाउन सक्दो सहयो गर्ने बताउनभुयो ।
प्रतिक्रिया दिनुहोस !
