गणतन्त्र जोगाउन तोकिएकै समयमा चुनाव : प्रधानमन्त्री

सुर्खेत : प्रधानमन्त्री शेरबहादुर देउवाले तोकिएकै मितिमा प्रदेश नम्बर २ मा स्थानीय तहको चुनाव सम्पन्न हुने बताउनु भएको छ । गणतन्त्र जोगाउनका लागि चुनाव अपरिहार्य भएको भन्दै उहाँले असोज २ गते प्रदेश नम्बर २ मा स्थानीय तहको र माघ अगाडि नै प्रदेश तथा केन्द्रीय संसदको चुनाव सम्पन्न हुने उल्लेख गर्नुभयो । 

‘गणतन्त्रलाई संस्थागत गर्नुछ, लोकतन्त्रलाई बलियो बनाउनु पर्नेछ’ वीरेन्द्रनगरमा सोमबार सम्पन्न मध्यपश्चिमाञ्चल विश्वविद्यालयको प्रथम दीक्षान्त समारोहमा प्रधानमन्त्री देउवाले भन्नुभयो, ‘सरकारको मुख्य ध्यान नै चुनावमा छ, असोज २ गते नै प्रदेश नम्बर २ मा स्थानीय चुनाव सम्पन्न हुन्छ । तोकिएको मितिमा नै प्रदेश र संसदको पनि चुनाव सम्पन्न गर्नेछौं, यसका लागि वर्तमान सरकार प्रतिबद्ध छ ।’

जनताको लामो संघर्षबाट प्राप्त गणतन्त्रलाई संस्थागत गर्न चुनाव एक मात्र विकल्प भएको प्रधानमन्त्रीले बताउनुभयो । चुनाव सफल बनाउनुपर्ने वर्तमान सरकारको दायित्व भएको भन्दै उहाँले सबै तहका चुनावमा उत्साहका साथ सहभागि हुन सबैलाई आग्रह गर्नुभयो ।

चुनावले नै जनताको भावना र आन्दोलनबाट प्राप्त उपलब्धीहरु संस्थागत गर्ने उहाँको दाबी थियो । आन्दोलनबाट प्राप्त उपलब्धीहरु गुम्न नदिनका लागि पनि सरकार तोकिएकै समयमा सबै तहको चुनाव सम्पन्न गर्न प्रतिबद्ध रहेको उहाँको भनाइ छ ।

विश्वविद्यालयका कुलपतिसमेत रहनुभएका प्रधानमन्त्री देउवाले सोही अवसरमा विश्वविद्यालयका विद्यार्थीहरुलाई दीक्षित गर्नुभयो । स्थापनाको सात वर्षपछि सम्पन्न प्रथम दीक्षान्त समारोहमा विभिन्न संकायका चार सय ५१ जना विद्यार्थीहरु दीक्षित भएका छन् । मध्यपश्चिम विश्वविद्यालयले विस्तारै गति लिन लागेको र यसको भौतिक तथा प्रशासनिक सुधारका लागि सरकारले सक्दो सहयोग गर्ने प्रधानमन्त्रीले आश्वासन दिनुभयो ।

यस्तै उपप्रधान तथा शिक्षामन्त्री गोपालमान श्रेष्ठले यस क्षेत्रको प्राकृतिक स्रोतको अनुसन्धान गर्नेगरी पाठ्यक्रम निर्माण गर्न विश्वविद्यालयलाई सुझाव दिनुभयो । दीक्षित विद्यार्थीहरुलाई आफ्नो ज्ञान र सीप राष्ट्र निर्माणमा लगानी गर्न उहाँले आग्रह गर्नुभयो । विश्वविद्यालयको सातौ सिनेट पनि सोमवार नै सम्पन्न भएको छ ।