'अमेरिकाले राखेको थाडले चीन र रुसलाई खतरा'

बेइजिङ : चीनका राष्ट्रपति सि जिनपिङले दक्षिण कोरियामा जडान गरिएको अमेरिकी थाड (टर्मिनल हाई अल्टिच्युड एरिया डिफेन्स) एन्टि मिसाइल सिस्टमले चीन र रसिया दुवैविरुद्ध गम्भीर खतरा उत्पन्न गरेको बताएका छन् ।

सोमबार रसियाको औपचारिक भ्रमणमा निस्कनुअघि राष्ट्रपति सिले बेइजिङबाट प्रस्थान गर्नुअघि दक्षिण कोरियामा थाड जडान तत्काल रोक्नुपर्ने भन्दै जडान भइसकेका थाड पनि हटाउन आग्रह गरे । चीनले थाड एन्टि मिसाइल सिस्टमको शक्तिशाली राडारले आफ्नो भूभागको निकै भित्रसम्म पनि हेर्नसक्ने भन्दै सुरुदेखि नै जडानको विरोध गर्दै आएको छ । यसबाट आफ्नो सुरक्षा र क्षेत्रीय सन्तुलनमा नै असर पार्ने दाबी चीनले गर्दै आएको छ ।

चीनको सरकारी समाचार एजेन्सी सिन्ह्वाले राष्ट्रपति सिको भनाइ उद्धृत गर्दै भनेको छ, 'अमेरिकाले दक्षिण कोरियामा जडान गरिरहेको अत्याधुनिक एन्टि मिसाइल सिस्टम थाडले चीन, रसिया र यस क्षेत्रका अन्य राष्ट्रको को रणनीतिक सुरक्षा हितमा गम्भीर खतरा उत्पन्न गरेको छ ।'

अमेरिका र दक्षिण कोरियाले भने थाड एन्टि मिसाइल सिस्टम उत्तर कोरियाबाट उत्पन्न खतराको प्रतिरक्षाका लागि मात्र जडान गरिएको एक स्वरमा भन्दै आएका छन् ।चिनियाँ राष्ट्रपतिले रसियाली सञ्चारमाध्यमसँग दिएको अन्तर्वार्तामा अहिलेसम्म थाडसम्बन्धमा चीन र रसिया दुवैले आपसी सहकार्य र समन्वय गरी समान धारणा बनाएको बताएका छन् । सिलाई उद्धृत गर्दै सिन्ह्वाले भनेको छ, 'चीन र रसिया दुवै दक्षिण कोरियामा थाड एन्टि मिसाइल सिस्टम जडानविरुद्ध छन् र सम्बन्धित राष्ट्रहरूसँग जडान तत्काल स्थगन गर्न आग्रह गर्छन् ।'

सिन्ह्वाका अनुसार चीन र रसियाले आफ्नो सुरक्षाका लागि संयुक्त वा एकल रुपमा आवश्यक कदम चाल्ने राष्ट्रपति सिले बताएको उल्लेख गरेको छ । तर उसले के कस्ता कदम चालिने हो कुनै विवरण भने दिएको छैन । राष्ट्रपति सिले चीन र रसिया दुवैले आपसी व्यापार, लगानी र आर्थिक सहयोग वृद्धि गर्न सहकार्य गर्नुपर्ने पनि बताएको सिन्ह्वाले उल्लेख गरेको छ ।

राष्ट्रपति सि रसियाको औपचारिक भ्रमण सकेर जर्मन सहर ह्याम्बर्गमा हुने औद्योगिक राष्ट्रहरूको सम्मेलनमा भाग लिन जानेछन् । थाड एन्टि मिसाइल सिस्टमका कारण चीन र दक्षिण कोरियाबीच द्विपक्षीय सम्बन्धमा तिक्तता आएको छ । मेमा दक्षिण कोरियाको राष्ट्रपतिमा मुन जाई–इन निर्वाचित भएपछि दुई देशबीचको तिक्तता अझै बढेको छ ।