काठमाडौं: सिद्धार्थ डेभलपमेन्ट बैंक लिमिटेडले आफ्नो ३९ औं शाखा हेटौंडामा विस्तार गरेको छ । उक्त शाखाको उद्घाटन कार्यक्रमका प्रमुख अतिथि हेटौंडा उपमहानगरपालिकाका नवनिर्वाचित मेयर हरिबहादुर महतले गर्नुभएको छ । सो अवसरमा उहाँले बैंक तथा वित्तीय संस्थाले बैकिङ सेवालाई सहरमा मात्र केन्द्रित नगरी ग्रामीण तथा सुदूर क्षेत्रका स्थानीय तहमा विस्तार गर्नुपर्ने आजको आवश्यकता भएको बताउनुभयो ।
कार्यक्रमका अतिथि उद्योग वाणिज्य संघ हेटौंडाका अध्यक्ष राजकुमार न्यौपानेले डेभलपमेन्ट बैंकले हेटौंडामा शाखा विस्तार गरेकोमा खुसी व्यक्त गर्दै व्यापारिक कर्जा भन्दा पनि प्रोजेक्टमा आधारित कर्जामा लगानी बढाउन सुझाव दिनुभएको छ ।
उक्त कार्यक्रममा डेभलपमेन्ट बैंकका अध्यक्ष रामबहादुर भण्डारीले शाखामा जडान गरिएको एटिएम मेसिनको उद्घाटन गर्दै डेभलपमेन्ट बैंकको जनता बैंक नेपालसँग मर्जसम्बन्धी प्रक्रिया टुंगिन लागेको जानकारी दिनुभएको छ । दुई सवल बैंकको एकीकृत कारोवारबाट उच्चस्तरको बैकिङ सेवा अभिवृद्धिका लागि सहयोग पुग्ने बताउनुभयो ।
कार्यक्रममा डेभलपमेण्ट बैंकका प्रमुख कार्यकारी अधिकृत अजय कुमार मि श्रले स्वागत मन्तव्य राख्दै सिद्धार्थ डेभलपमेन्ट बैंक व्यावसायिक तथा सांगठनिक रूपमा सवल डेभलपमेन्ट बैंक रहेको उल्लेख गर्नुभएको छ ।
उहाँले जनता बैंक नेपालसँगको एकीकृत कारोवारले नेपालको बैकिङ क्षेत्रमा एक सवल, सक्षम र उच्च व्यावसायिक बैंकका रूपमा गुणात्मक वृद्धि गरी वित्तीय पहुँच विस्तार गर्ने दृढता व्यक्त गर्नुभयो । शाखा उद्घाटन समारोहमा उद्योगी तथा समाजसेवी अरुण सुमार्गीलगायत हेटौंडाका उद्योगी व्यापारी सहभागी हुनुहुन्थ्यो ।
उक्त कार्यक्रम बंकका उप–महाप्रबन्धक ध्रुवकुमार पौडेलले सञ्चालन गर्नुभएको थियो । जनता बैंक नेपालसँग मर्ज हुने अन्तिम चरणमा रहेको सिद्धार्थ डेभलपमेन्ट बैंकको मर्जपछि जनता बैंक नेपालका नेपालभर रहेका एक सय १३ वटा शाखाबाट बैकिङ सेवा–सुविधा प्राप्त गर्न सकिने बैंकले जनाएको छ ।
प्रतिक्रिया दिनुहोस !
