काठमाडौं : हिमालपारिको जिल्ला भनेर चिनिने मुस्ताङमा कला कार्यक्रम सम्पन्न भएको छ । नेपाल ललितकला प्रज्ञाप्रतिष्ठान अन्तर्गतको चित्रकला विभागले कला प्रचारप्रसार, अध्ययन तथा विद्यार्थीका लागि कला कार्यक्रम २०७४ आयोजना गरेको हो ।
मौलिक सांस्कृतिक सम्पदा, फरक शैलीको जीवनयापन, संवेदनशील तथा मनोरम प्राकृतिक छटाले धनी मुस्ताङ कला विकासका दृष्टिले ओझेल परेको मानिँदै आएको छ । बर्सेनि स्वदेशी तथा विदेशी पर्यटकको लर्को लाग्ने मुस्ताङमा कलाको विकास गर्न सकिए नेपाली कला क्षेत्रले मनग्य लाभ लिनसक्ने बताइएको छ ।
विश्वसामु नेपाली कला र कलाकारलाई थप चिनाउन यसले मद्दत गर्ने सहभागीले बताएका छन् । विभिन्न धार्मिक क्षेत्र र गुम्बाका कारण यस क्षेत्रमा परम्परागत चित्रकलाको प्रभाव पहिलेदेखि नै रहेको अनुमान गरिएको छ ।
कार्यक्रममा मुस्ताङका जनहित मावि, धौलागिरि मावि, जनकल्याण आधारभूत विद्यालय, मुक्ति नमुना आधारभूत विद्यालय, जनवाल माविका करिब ४० जना विद्यार्थी सहभागी थिए । कला प्रशिक्षण कार्यक्रम यही असार १८ र १९ गते जोमसोममा सम्पन्न भएको प्रतिष्ठानले जनाएको छ ।
सहभागी विद्यार्थीलाई पानी रङको माध्यमबाट चित्रकला बनाउने विभिन्न प्रारम्भिक तरिका र अभ्यास गराइएको थियो । अतिथिका रूपमा व्यवस्थापिका संसद्का सदस्य श्रीमाया थकालीले दुर्गम ठाउँमा आएर विद्यार्थीलाई कला शिक्षा दिने र कलाको महत्वव बुझाउने कार्य सराहनीय भएको बताइन् ।
घरपझोङ गाउँपालिकाका नवनिर्वाचित अध्यक्ष आशबहादुर थकाली, उपाध्यक्ष शर्मिला गुरुङले शुभकामना कार्यक्रममा शुभकामना दिएका थिए । पूर्वसांसद तथा धौलागिरि बोर्डिङ स्कुलका प्राचार्य चन्द्रबहादुर गुरुङको अध्यक्षतामा भएको कार्यक्रममा कलाकार मनोज तामाङले विद्यार्थीलाई प्रशिक्षण दिएका थिए ।
प्रतिक्रिया दिनुहोस !
