उदयपुरको बेलका नगरपालिकामा कांग्रेसलाई पछि पार्दै एमालेले अगाडि

गाईघाट : उदयपुरको बेलका नगरपालिकामा नेपाली कांग्रेसका उमेदवार पछि परेका छन्। दुई दिनसम्म ८ सय ५० मतको फराकिलो मतान्तर बनाएका कांग्रेसका मेयरका उमेदवार अशोक कार्की पछिल्लो मत परिणाम अनुसार २४६ मतले पछाडि छन्।

साविक तपेश्वरी गाविस हालको बेलका नपाको वडानं १ र २ को गणना हुँदा कार्कीले एमाले उमेदवार दुर्गाकुमार थापालाई ८ सय ५० मतले पछि पार्नु भएको थियो। यो कार्कीको घर भएको वडा हो। पछिल्लो समय साविक रामपुरठोक्सिला, मैनामैनी र ववला गाविस हालको वडानं ३, ४, ५, ६, ७, ८ मा प्रवेश गरेपछि थापाले मतान्तर घटाउँदै २ सय ४६ मतको फरक बनाउनु भएको हो।

थापाले ४ हनार ९ सय ४३ र कार्कीले ४ हजार ६ सय ९७ मत प्राप्त गर्नु भएको छ। अब ९ वडाको को १५ सय ६१ मत मात्र गन्न बाँकी छ। वडानं ९ पनि एमालेकै क्षेत्र भएकाले ५ सय मतको फरक हुन सक्ने एमालेको अनुमान छ। थापा साविकको रामपुरठोक्सिला गाविसको ०५४ सालको निर्वाचित अध्यक्ष हुन्।

त्यसैगरी उपमेयरमा एमालेकी राजकुमारी चौधरी ५ सय ९२ मतका साथ अग्रस्थानमा हुनुहुन्छ। चौधरीले ५२ सय ४१ र प्रतिस्पर्धी दीपा राईले ४६ सय ४९ मत प्राप्त गर्नुभएको छ।