भारत-पाकिस्तान तनावमै सार्क बैठक

काठमाडौं : भारत-पाकिस्तानबीचको तनावकै अवस्थामा दक्षिण एसियाली क्षेत्रीय सहयोग संगठन (सार्क)का मन्त्रीस्तरीय बैठक आयोजना हुन थालेका छन् । भोलि (बिहीबार) श्रीलंकामा सार्क गृहमन्त्रीस्तरीय बैठक हुँदै छ । बैठकमा क्षेत्रीय आतंकवाद नियन्त्रण, सीमापार आतंकवादबाट उत्पन्न समस्या हल, साइबर अपराध नियन्त्रण गर्नेलगायत विषयमा छलफल हुने भएको छ ।

सार्क सचिवालयका अनुसार सार्कका स्वास्थ्यमन्त्रीस्तरीय बैठक पनि जुलाई अन्तिम साता कोलम्बोमा बस्नेछ । संयुक्त राष्ट्रसंघीय महासभाको दौरान सार्कका विदेशमन्त्रीहरूको बैठक (सार्क काउन्सिल अफ मिनिस्टर्स) अगस्टमा न्युयोर्कमा हुनेछ । सार्कका विदेशमन्त्रीहरूको बैठकले सार्क शिखर सम्मेलनबारे पनि छलफल गर्नेछ । 'सार्कका मन्त्रीस्तरीय बैठकहरूले १९औं शिखर सम्मेलन आयोजना गर्न सकारात्मक माहोल निर्माण हुने विश्वास लिइएको छ', परराष्ट्र मन्त्रालयका एक अधिकारीले भने ।

सार्कको वर्तमान अध्यक्ष मुलुक नेपालले पनि शिखर सम्मेलन आयोजनाका लागि सकारात्मक वातावरण बनाउन भारत र पाकिस्तानलाई आग्रह गरिसकेको छ । हालैको भारत भ्रमणमा परराष्ट्रमन्त्री कृष्णबहादुर महराले भारतीय समकक्षी सुष्मा स्वराजसँग सार्क सम्मेलनका लागि भारतको भूमिका महत्वपूर्ण हुने स्मरण गराउनुभएको थियो । मन्त्री महराका अनुसार भारतीय विदेशमन्त्री स्वराजले सार्क सम्मेलन गर्नुपर्छ भन्नेमा भारत सकारात्मक रहेको बताउनुभएको थियो । 'तर, सार्क शिखर सम्मेलनका लागि पाकिस्तानले माहोल बनाउन आवश्यक छ', स्वराजले भन्नुभएको थियो ।

नेपालमा मन्त्रिपरिषद् विस्तार भएलगत्तै सार्कका यातायात र ऊर्जामन्त्रीस्तरीय बैठक काठमाडौंमा आयोजना गर्ने तयारी छ । यसअघि पाकिस्तानले अप्रिल १२ र १३ मा इस्लामावादमा सार्क 'साउथ एसियन इकोनोमिक युनियन' बनाउने अवधारणाबारे बैठक आयोजना गरेको थियो । उक्त बैठकमा भारतलगायत सार्कका सबै सदस्य मुलुकको सहभागिता थियो । त्यसअघि फेब्रुअरी १ देखि ३ सम्म नेपालमा सार्क कार्यक्रम समितिको बैठक आयोजना भएको थियो ।

सार्कका अन्य संयन्त्रका बैठक सुचारु गर्ने तयारी पनि भइरहेको परराष्ट्रका एक अधिकारीले बताए । सार्कको ३२ वर्षे यात्रामा भारत र पाकिस्तानबीच कस्मिरलगायत विषयमा विवाद हुँदै आएका कारण सार्कका नियमित बैठक रोकिने र पुनः आयोजना हुने घटना प्रशस्त छन् । 'गत वर्ष सार्क शिखर सम्मेलन स्थगन भएपछि केही महिना सार्कका बैठक प्रभावित भए पनि फेरि हुन थालेका छन् । यसले सार्क शिखर सम्मेलनको वातावरण बनाउने हाम्रो अपेक्षा छ', परराष्ट्रमा सार्क महाशाखा हेर्ने सहसचिव मणिप्रसाद भट्टराईले भन्नुभयो ।

नोभेम्बर ८ देखि १० का लागि प्रस्तावित सार्कको १९औं शिखर सम्मेलन भारतसहित चार मुलुकले सहभागी हुन अस्वीकार गरेपछि स्थगन भएको थियो । एक वर्षयता कस्मिरमा भएका आतंककारी आक्रमणमा पाकिस्तान जिम्मेवार रहेको भारतको आरोप छ । पाकिस्तानले भने भारतको आरोपलाई अस्वीकार गर्दै आएको छ । सार्क सम्मेलनको नयाँ मिति अझै तय हुन सकेको छैन ।