एक सातामै दोब्बर योजना सम्पन्न

 स्याङ्जा :  आर्थिक वर्ष सकिन ४ दिन बाँकी रहँदा जिल्ला समन्वय समितिको कार्यालय स्याङ्जामा उपभोक्ताको घुइँचो बढ्दो छ । असारको तेस्रो साता ३० प्रतिशत मात्र योजना सम्पन्न भएको स्याङ्जामा असारको अन्तिम सातामा आइपुग्दा ७० प्रतिशतभन्दा बढी योजना सम्पन्न भएको जिल्ला समन्वय समिति स्याङ्जाले जनाएको छ ।

अघिल्लो साता ३० प्रतिशत योजना सम्पन्न भएकामा यो सातामा योजना सम्पन्न गरेका प्रतिवेदन लिएर आउने उपभोक्ता दोब्बरभन्दा बढी छन् । मानो खाएर मुरी उब्जाउने महिना असारको माचो बिर्सेर पेस्की फस्र्योट र बाँकी रकम भुक्तानी लिनेको लाइन छ । अघिल्लो सातासम्म सुनसान रहेको जिल्ला समन्वय समितिमा यतिबेला उपभोक्ता समितिका पदाधिकारीको घुईँचो छ ।

जिल्ला समन्वय समिति स्याङ्जाका अनुसार जिल्लाभर सञ्चालित आठ सय ५० वटा विभिन्न शीर्षकका योजनामध्ये ९८ प्रतिशत योजना फागुनमा सम्झौता भएका थिए । जिल्लामा सञ्चालित योजनामध्ये निर्वाचन क्षेत्र विकास अन्र्तगतका एक सय ४७ वटा योजना, पूर्वाधार विशेष कार्यक्रम अन्र्तगतका ८७ वटा योजना र आर्थिक केन्द्र (दुई जिल्ला जोड्ने ) सडक अन्र्तगत एक सय सात योजना छन् ।

यसैगरी झोलुंगे पुल क्षेत्रगत कार्यक्रम, सडक पुल, साना सिँचाइ तथा नदी नियन्त्रण, स्थानीय यातायात क्षेत्रगत कार्यक्रम, पश्चिम नेपाल ग्रामीण खानेपानी योजना, जिल्ला कोष र अनुदानबाट सञ्चालित एक सय ५० वटा योजनालगायत सडक, भवन, कृषि, सिँचाइ, समावेशी बजेटलगायत योजना रहेको स्थानीय विकास अधिकारी विश्वप्रकाश अर्यालले जानकारी दिनुभयो ।

केन्द्रीय योजनाअन्र्तगत आठ सयवटा योजना फागुन मसान्तभित्र सम्पन्न भइसकेका थिए भने थप अनुदान स्वरुप स्याङ्जामा आठ करोड रुपैयाँ वैशाखपछि निकासा भएको थियो । थप अनुदानअन्र्तगत सडक, भवन, कृषि, सिँचाइ, नदी नियन्त्रणलगायत योजनाका काम पनि सम्पन्न भैसकेको योजना शाखा अधिकृत यामप्रसाद रेग्मीले बताउनुभयो । स्थानीय विकास अधिकारी विश्वप्रकाश अर्याल योजना निर्माणकार्यमा लाग्ने समयमा स्थानीय तहको निर्वाचन भएपछि उपभोक्ता र स्थानीयवासी सबै निर्वाचनमा जुटेका कारण यसवर्ष असारको अन्तिम सातासम्म पनि योजना सम्पन्न हुन ढिलाइ भएको बताउनुहुन्छ ।