३० हजार फलफुलका बिरुवा बितरण

सिलगढी (डोटी)  : जिल्ला कृषि विकास कार्यालय डोटीले किसानहरुलाई ३० हजार फलफुलका बिरुवा बितरण गरेको छ। बर्षात्को समय सुरु भएसंगै किसानहरुको मागअनुसार फलफुलका बिरुवाहरु बितरण गरिएको हो ।

व्यवसाय गर्ने उद्देश्यले किसानहरुले फलफुलका बिरुवाहरु माग गरेको जिल्ला कृषि विकास कार्यालयले जानकारी दिएको छ । बितरण भएका बिरुवाहरुमा आँप, लिची, कागती, सुन्तला, मौसमीलगायतका रहेका छन् । बितरण गरिएका बिरुवाहरु अधिकांश अनुदानमा गरिएको हो ।

१० रोपनीदेखि १० हेक्टरसम्मको जमिनमा फलफुलको बगैचा बनाउने उद्देश्यले किसानहरुबाट बिरुवाको माग भएको जिल्ला कृषि विकास कार्यालयका बरिष्ठ कृषि विकास अधिकृत डा. तपेन्द्र शाहले बताउनु भयो । ‘बगैचा बनाउने भनि माग भएका बिरुवाहरु ८५ प्रतिशत छुट अनुदानमा दिइएको छ', शाहले भन्नुभयो, ‘फुटकर बिरुवा लैजानेलाई भने पुरै मुल्यमा दिइएको छ ।'

फलफुल खेतीमा किसानहरुको आकर्षण बढीरहेको उहाँले बताउनु भयो । ‘बिगतका बर्षहरुमा पनि किसानहरुले फलफुलको माग राम्रै गरेका थिए', शाहले भन्नुभयो, ‘४/५ बर्ष पछि किसानहरुलाई फलफुलले राम्रो प्रतिफल दिने छ ।'  

बितरण गरिएका फलफुलका बिरुवाहरुमा कागती १३ हजार बिरुवा, आँप ८ हजार, लिची २ हजार, मौसमी २५ सय, सुन्तला २५ सय, अनार ५ सय, केरा ५ सय, अम्बा ५ सय, कटहर ३ सय, निबुवा ३ सय संख्यामा रहेका छन् । बितरण गरिएका बिरुवाहरुमा जिल्लाको वातावरण अनुसार ७० प्रतिशतभन्दा बढी बच्ने जिल्ला कृषि विकास कार्यालयले जनाएको छ ।