चन्दननाथको प्राथमिकतामा सडक र विद्युत

जुम्लाः कर्णालीकै पहिलो र ठूलो नगरपालिका चन्दननाथको विकासका लागि ३१ करोड रुपैयाँ विनियोजन गरिएको छ । नगरपालिका प्रमुख  कान्तिका सेजुवालले नगरपालिकाको आर्र्थिक वर्ष २०७४/७५ का बजेटका साथै नीति तथा कार्यक्रम सार्वजनिक गर्नुभएको हो । नगरपालिकाको समृद्धिका लागि कुल ३० करोड ९१ लाख ४८ हजार बराबरको बजेट प्रस्ताव गरिएको छ ।  

जसमा पुँजीगत र चालूतर्फको खर्चमा थोरैमात्र अन्तर देखिएको छ । चालू खर्चका लागि १३ करोड ११ लाख एकहजार रुपैयाँ र पूँजीगत तर्फ १७ करोड ८० लाख ४७ हजार बरारबर खर्च हुने नगरपालिकाले पहिलो नगरसभामा प्रस्तुत गरेको बजेटमा उल्लेख छ । आ.व. २०७४/०७५ मा नगरपालिकाको आम्दानीमा स्वआर्जनकोषतर्फ २० लाख रुपैयाँ प्रस्ताव गरिएको छ ।

यस्तै, राजश्व बाँडफाँडमा ३० लाख, केन्द्रबाट निशर्त आउने अनुदान १७ करोड, १७ लाख ४७ हजार रुपैयाँ, शर्तसहतिको अनुदान ६ करोड ४७ लाख एकहजार रुपैयाँ, कर्णाली रोजगारको दुई करोड ७७ लाख, सामाजिक सुरक्षा ४ करोड गरी जम्मा रु. ३० करोड ९१ लाख ४८ हजार बराबरको बजेट प्रस्ताव गरिएको हो ।  

सीमित श्रोत भएता पनि योजनावद्ध रुपमा काम भए उपलव्धिमुलक नतिजा प्राप्त गर्न सकिने प्रमुख कान्तिका सेजुवालले बताउनुभयो । राम्रो योजना बन्नु नै आधा काम सक्नु भन्दै सेजुवालले नगरपालिकाले नतिजामा आधारित योजनाबद्ध विकास गर्ने दिशातर्फ आफ्ना नीति, कार्यक्रम तथा बजेट परिलक्षित गरेको बताउनुभयो ।

बजेटमा सडक र विद्यतुलाई मुख्य प्राथमिकता दिइएको छ । नगरपालिका भित्रै विद्युत सेवा नहुँदा नगरवासीहरु सञ्चार र उज्यालोबाट बञ्चित रहेको भन्दै विद्युत व्यवस्थापनका लागि एक करोड २० लाख रुपैयाँ विनियोजन गरिएको छ । जुगाडखोलामा निर्माणाधीन ५२ किलोवाट र चन्दननाथ १ मा रहेको एकसय किलोवाटको ठिन्के साना जलविद्युत आयोजनाको काम सम्पन्न गरी नगरवासीलाई उज्यालोमा बस्ने बातावरण बनाउने कामलाई नगरपालिकाले प्राथमिकतामा राखेको छ ।

मनपरी ढंगले योजना छनौट गरी आफु अनुकुल बजेट विनियोजन गरेको भन्दै चन्दननाथको बजार क्षेत्रको पाँच नम्बर वडाका वडाअध्यक्षले नगरसभा बहिस्कार गरेका छन् । वडाअध्यक्ष गोल्डेन कठायतले बजार क्षेत्रमा कर्णाली रोजगारको बजेट विनियोजन नभएको र अन्य योजना छनौटमा पनि मनोमानी गरेको भन्दै सभा बहिस्कार गर्नुभएको हो ।