राष्ट्रपति सीका विश्वास पात्र चेन चोङकिङ पार्टी प्रमुख

संघाई/बेइजिङ : चिनियाँ राष्ट्रपति तथा कम्युनिस्ट पार्टीका महासचिव सि चिनफिङका उत्तराधिकारी मानिएका चेन माइनर शनिबार दक्षिण पश्चिमी महानगर चोङकिङको कम्युनिस्ट पार्टी प्रमुखमा नियुक्त भएका छन् । चेन राष्ट्रपति सिका सबैभन्दा नजिक र मन परेका उदीयमान नेता मान्छि ।

चिनियाँ कम्युनिस्ट पार्टीको आगामी शरद्मा बस्ने कंग्रेसमा हुने पार्टीको फेरबदलअघि चेनलाई चोङकिङको पार्टी प्रमुखमा बढुवा गरिएको छ । महासचिव तथा राष्ट्रपतिको दोस्रो कार्यकाल सम्हालिरहेका सिले यस वर्ष नयाँ पोलिटब्युरो स्ट्यान्डिङ कमिटि गठनको तयारी गरिरहेको अनुमान गरिएको छ । सिले उनका विश्वासपात्र चेनलाई बढुवा गरी पार्टी र सत्तामा आफ्नो पकड अझै सुदृढ नै रहेको संकेत पनि दिएका छन् । चेनले यसअघि राष्ट्रपति सि मातहत झेजियाङ प्रान्तमा काम गरिसकेका छन् ।

झेजियाङमा सि पार्टीका प्रान्तीय प्रमुख थिए र पार्टीभित्र तीव्र गतिमा माथि उक्लिरहेका थिए । चेनले आफू सिको निकट भएको सार्वजनिक रुपमा नै भन्ने गरेको उनीसँग भेट गरेका विदेशी कूटनीतिज्ञहरूले बताउने गरेका छन् । सि कम्युनिस्ट पार्टी सत्तामा पुगेपछि पार्टीभित्र चेनको पनि छिटो छिटो पदोन्नती भएका छ ।

चेनले चोङकिङ पार्टी प्रमुख सुन झेङकाईलाई विस्थापन गर्नेछन् । यसअघि चेन दक्षिण पश्चिमको गरिब प्रान्त गुइझाऊका पार्टी प्रमुख रहेको चीनको सरकारी समाचार एजेन्सी सिन्ह्वाले जनाएको छ । तर सुनलाई कहाँ पठाइने हो उल्लेग गरेको छैन । सुनलाई राजधानी बेइजिङको पार्टी प्रमुखमा नियुक्त गरिने अनुमान गरिएको छ ।

सुनलाई पनि यसअघि पदोन्नति हुने र केन्द्रीय पदमा पुग्ने सम्भावना भएका नेताका रुपमा हेरिए पनि अहिले उनको राजनीतिक यात्रा ओरालो लागेको संकेत देखिएको छ । यसै वर्ष भ्रष्टाचारविरोधी निकायले बोको प्रभाव घटाउन नसकेको भन्दै भ्रष्टाचार मामिलामा चोङकिङ प्रशासनको आलोचना गरेको थियो ।

यसअघि चोङकिङको व्यापक चर्चा त्यहाँका शक्तिशाली तथा सम्भावित पार्टी नेताका रुपमा चिनिएका बो सिलाईका कारण विश्वभर नै चर्चित भएको थियो । बोलाई भ्रष्टाचार र एक बेलायती व्यवसायीको हत्या अभियोगमा सन् २०१३ मा जन्मकैदको सजाय सुनाइएको थियो ।

सन् २०१२ मा गुइझाऊ प्रान्तको कम्युनिस्ट पार्टीमा सचिव नियुक्त गरिएको चेन एक वर्ष पनि नपुग्दै र सि राष्ट्रपति निर्वाचित भएको एक महिना नबित्दै गभर्नर नियुक्त भएका थिए । सन् २०१५ मा फेरि उनको पदोन्नति गरेर गुइझाउको पार्टी प्रमुख बनाइएको थियो ।

पार्टी उच्च स्रोतका अनुसार सिको सहायताले चेन विपक्षी खेमाका प्रतिस्पर्धीलाई उछिनेर चिनियाँ कम्युनिस्ट पार्टीको स्ट्यान्डिङ कमिटीमा सोझै पर्न सक्छन् । उनलाई कमिटीका लागि ‘डार्क हर्स’ उम्मेदवार मानिएको छ ।पिछडिएको गुुइझाऊ प्रान्तबाट चर्चित महानगर चोङकिङ प्रमुखका रुपमा नियुक्ती पाउनुले पार्टीको केन्द्रीय पोलिटब्युरोमा चेनको उपस्थिति लगभग निश्चित संकेत मानिएको छ ।

चिनियाँ कम्युनिस्ट पार्टीको १९ औं कंग्रेस यसै वर्ष शरदमा बस्ने भएकाले उनले फेरि अर्को पदोन्नतिका लागि केही समय कुर्नुपर्ने पनि हुनसक्छ । किनभने एउटा ‘हाई प्रोफाइल’ पदमा नियुक्ति पाएको एक÷दुई महिनामै अर्को ठूलो पदोन्नति हुनु असामान्य हुनेछ ।

चीनले तीव्र गतिमा आर्थिक विकास गरिरहँदा गुइझाऊ भने अझै पनि अत्यन्त पिछडिएको प्रान्तका रुपमा रहेको छ । अहिले भने बल्ला संघीय सरकारले गुइझाऊमा गरिबी निवारण गर्न अर्बौ रकम खनाउन थालेको छ । सिन्ह्वाका अनुसार गुइझाऊका गभर्नर सुन झिगाङले प्रान्तको पार्टी प्रमुखको जिम्मेवारी सम्हाल्ने छन् ।