काठमाडौं : भारतको पश्चिम बंगालका मुख्यमन्त्री ममता बनर्जीले नरेन्द्र मोदी नेतृत्वको भारतीय जनता पार्टीको सरकारले नेपाललगायत छिमेकी मुलुकसँग आफ्नो राज्यको सम्बन्ध बिगारिदिएको भन्दै चर्को आलोचना गर्नुभएको छ ।सोमबार भारतीय राष्ट्रपति निर्वाचनमा मतदान गरेर बाहिरिने क्रममा पत्रकारसँग कोलकातामा मुख्यमन्त्री बनर्जीले यसरी मोदीको आलोचना गर्नुभएको हो । ‘पश्चिम बंगालको नेपाल, भुटान र बंगलादेशसँग सीमा जोडिएको छ’, उहाँले भन्नुभयो, ‘मोदीले यी मुलुकसँग सम्बन्ध बिगारेको फल हामीले भोग्नुपरेको छ ।’
उहाँले सिक्किमलाई चीनले नियन्त्रणमा लिए दार्जिलिङले त्यसको मूल्य चुकाउनुपर्ने चेतावनी दिनुभयो । ‘हामीसँग सीमा जोडिएका सबै मुलुकसँग सम्बन्ध बिगार्नुपर्ने आवश्यकता के थियो मोदीलाई ? ’, उहाँले आक्रोशित मुद्रामा भन्नुभयो । ०७२ असोज ३ मा नेपालमा संविधान जारी भएलगत्तै मधेस आन्दोलनको बहानामा मोदी नेतृत्वको सरकारले झन्डै ६ महिना नाकाबन्दी गरेको थियो । त्यसप्रति बनर्जीले विगतमा पनि असन्तुष्टि जनाउनुभएको थियो । उहाँले बंगलादेशसँग मोदी सरकारले सम्बन्ध बिगारेको आरोप पनि लगाउँदै आउनुभएको छ ।
भुटान र चीनले स्वामित्व दाबी गरिरहेको डोक्लम क्षेत्रमा चीनले सडक निर्माण गरेपछि त्यसलाई रोक्न भारतले सेना परिचालन गर्दा द्विपक्षीय तनाव उत्पन्न भएको छ । यही सन्दर्भ कोट्याउँदै बनर्जीको यस्तो भनाइ आएको भारतीय सञ्चारमाध्यमले जनाएका छन् । डोक्लमबाट पश्चिम बंगाल करिब ९० किलोमिटर दूरीमा पर्छ । ‘दार्जिलिङ र नेपालको सीमा नजिक पर्ने पशुपति गेटमा ४ सय चिनियाँ भाषा पढाइ हुने स्कुल स्थापना गर्दा पनि भारतका खुफिया एजेन्सी ‘र’ र सीमा सशस्त्र सीमा बलले के हेरेर बसेका थिए ? ’, उहाँले प्रतिप्रश्न गर्नुभयो । भारत र चीनबीचको सीमा द्वन्द्वमा बंगाल ‘स्यान्ड विच’ बनेको उहाँको भनाइ थियो ।
प्रतिक्रिया दिनुहोस !
