डब्लूएफपीको खाद्यान्न कुहिएर नष्ट

गोरखा : कामका लागि खाद्यान्न कार्यक्रमअन्तर्गत विश्वखाद्य कार्यक्रम (डब्लूएफपी) ले गोरखाको दुर्गम भेगमा पु¥याएको दाल र चामल अधिकांश कुहिएको छ। सिर्दिबास र उहियामा सोमबार वितरणको क्रममा अधिकांश अन्न कुहिएको भेटिएको बासिन्दाले बताएका छन्। 

‘आधाजसो कुहिएको रहेछ,' उहियाको खोर्ला गाउँका जित गुरुङले भन्नुभयो, ‘प्रत्येक घरलाई एक सय ५० केजी चामल र २७ केजी दाल दिने भनेर बाँड्न थालेकोमा जम्मा नौ किलोका दरले दाल र ७५ किलोका दरले चामल मात्र पुग्यो।' बाँकी अर्को चरणमा बाँड्ने आश्वासन पाएको उहाँले बताउनुभयो। सिर्दिबासको जगतमा पनि सोमबार वितरण गर्दा दाल र चामल कुहिएको भेटिएको हाे ।

चामलभन्दा दाल धेरै कुहिएको भेटिएको त्यहाँका वडा अध्यक्ष रामकुमार गुरुङले जानकारी दिनुभयो। ‘दालमा ढुसी लागेको, डल्लो परेको, कीरा लागेको भेटियो', उहाँले भन्नुभयो, ‘चामल पनि डल्लो परेको, ढुसी लागेको । चामलभन्दा पनि दाल धेरै कुहिएको रहेछ ।' खच्चडबाट ओसार्दैमा पानीले भिजेर दाल, चामल बिग्रिएको उहाँले बताउनुभय । ‘ओसार्दैमा २० वटा बोरा भिजेको थियो ।

गोदाम गरेको ठाउँमा पनि माटोको चिसो ओसले १५ बोराजति बिग्रिएछ', जितबहादुरले भन्नुभयो, ‘तर बिग्रिएको दाल, चामल बाँडेको छै । डब्लूएफपी, गोरेटो गोरखाका कर्मचारी र गाउँका वुद्धिजीवी मिलेर छानेर सद्दे मात्र बाँडेका छन्।' अपुग चामल र दाल दोस्रो चरणमा ल्याएर बाँड्ने उहाँको भनाइ छ । तर कहिले बाँड्छन् भन्ने खुलाइएको छैन।

उहियाको खोर्लामा करिब दुई सय घरलाई बाँडिसकिएको छ भने सिर्दिबासको ६९ घरलाई बाँडिएको छ। सिर्दिबासको करिब ६ सय घरलाई बाँड्नुपर्ने र उहियाको करिब चार सय घरलाई बाँड्नुपर्ने स्थानीयको भनाइ छ। उहियामा भने अहिलेसम्म नबाँडिएको स्थानीय छलमाया गुरुङको भनाइ छ।
डब्लूएफपीले भूकम्पपीडितलाई पुनर्लाभ कार्यक्रमअन्तर्गत उहिया र सिर्दिबासमा कामका लागि खाद्यान्न कार्यक्रम सञ्चालन गरेको थियो ।

गोरेटो गोरखासँगको स्थानीय साझेदारीमा बाटो निर्माण गरिएको हो। ४० दिन काम गरेबापत प्रतिव्यक्ति एक सय ५० किलो चामल र २७ किलो दाल दिने सम्झौता थियो। गत जेठको दोस्रो हप्तामा काम सम्पन्न भए पनि डेढ महिनासम्म पनि खाद्यान्न वितरण नभएको स्थानीयवासीको गुनासो थियो।
लामो समय नबाँडेका कारण चामल र दाल कुहिएको हो। कामदारको नामको चामल र दाल कुहिएपछि श्रमबराबरको दाल चामल फेरि कहिले पाउने भन्ने अनिश्चित छ। 

बर्खा याममा बूढीगण्डकीको बाढी, पहिरोका कारण उक्त क्षेत्रमा आवतजावत अबरुद्ध हुनेगर्छ। दाल र चामलले दुई महिना बर्खालाई पुग्ने आशाले स्थानीयवासीले बिगतमा झै बर्खे खर्चको जोहो गरेका थिएनन्।