कतार संकट: साउदी अरेबिया र उसका सहयोगी किन भए नरम

दोहा : कतारसँग राजनीतिक सम्बन्ध तोड्नुका साथै उविरुद्ध नाकाबन्दी गर्ने चार अरब देशले नरम रवैया अपनाएका छन् ।सम्बन्ध कायम गर्न र नाकाबन्दी हटाउन साउदीसँगै युनाइटेड अरब इमिरेट्स (यूएई), इजिप्ट र बहराइनले गत महिना कतारसामु १३ सर्त तेस्र्याएका थिए । अहिले आएर यी चारै देशले ६ वटा मात्र सर्त मान्न कतारसामु जोड दिएका छन् । संयुक्त राष्ट्र संघमा साउदी, यूएई, बहराइन र इजिप्टका प्रतिनिधिले यसबारे जानकारी गराएका हुन् ।

उनीहरूका ६ सर्तमा कतारले आतंकवाद र उग्रवादसँग लड्न प्रतिबद्धताका साथै उत्तेजना फैलाउने र भड्काउने काम रोक्नुपर्ने सामेल छन् । कतारले यी चार देशका सर्तमा तत्काल कुनै प्रतिक्रिया जनाएको छैन । उसले आफूमाथि लगाइएका आतंकवादलाई सघाएको आरोपको निरन्तर खण्डन गर्दै आएको छ । यी चार देशपछि यमन, लिबिया र माल्दिभ्सले पनि कतारसँग सम्बन्ध विच्छेद गरेका थिए ।

कतार त्यस्ता कुनै पनि सर्त मान्न अस्विकार गरेको छ, जुन सर्तले उसको सार्वभौमसत्तामाथि खतरा उत्पन्न गर्छ वा जसले अन्तर्राष्ट्रिय कानुन उल्लंघन गर्छ । साथै उसले आफ्ना छिमेकीद्वारा गरिएको घेराबन्दीको आलोचना गर्दै आएको छ । २७ लाख जनसंख्या रहेको कतारले दैनिक आवश्यकता पूर्तिका लागि सामुद्रिक र हवाईमार्गबाट सामान आयात गर्नु परिरहेको छ । अहिले इरान र टर्कीले कतारलाई हवाईजहाज र पानीजहाजबाट खाद्यान्नलगायत दैनिक उपभोग्य सामग्री पठाइरहेका छन् । न्युयोर्कस्थित संयुक्त राष्ट्र संघमा पत्रकारहरू समक्ष यी चार अरब देशका प्रतिनिधिले भने कि उनीहरू यो संकटको सौहाद्र्रपूर्ण समाधान होस् भन्ने चाहन्छन् ।

राष्ट्र संघमा साउदी अरेबियाका स्थायी प्रतिनिध अब्दुल अल-मुआलेमले चार देशका विदेशमन्त्रीहरू जुलाई ५ मा काहिरामा भएको बैठकमा ६ मागमा सहमत भएको र यी माग मान्न कतारका लागि सहज हुने बताए । उनले भने, ‘स्थिति सुधार्ने उद्देश्य अल-जजीरा बन्द गरेर मात्र पनि हासिल गर्न सकिन्छ । यदि हामी अल-जजीरा बन्द नगरिकनै सुधारको उद्देश्य पूरा गर्न सकिन्छ भने यो अझ बेस् । महत्वपूर्ण कुरा हिंसालाई बढावा दिने र घृणा फैलाउने भाषणबाजी बन्द गर्नु पर्छ ।'

२२ जुनमा कतारसामु राखिएका १३ सर्तमध्ये अल-जजीराको प्रशारण बन्द गर्नुपर्ने, कतारस्थित टर्कीको सैन्य अखडा बन्द गर्नुपर्ने, मुस्लिम ब्रदरहुडसँगको सम्बन्ध तोड्नुपर्ने र इरानसँगको सम्बन्ध तोड्नुपर्ने मुख्य थिए ।