मेहन्दीको महिना
फेसन डिजाइनर वर्षा श्रेष्ठले हरेक वर्ष साउनमा मेहन्दी लगाउने गरेकी छन् । साउन भनेको हरियो चुरा र मेहन्दी लगाउने महिना हो भन्ने बुझेकाले पनि साउनमा उनी खाली हात बसेकी छैनन् । आफ्नो हातमा मेहन्दी लगाउनमात्र नभई अरूका हातमा विभिन्न डिजाइनका मेहन्दी लगाइदिन पनि उनलाई रमाइलो लाग्छ । त्यसैले साउनमा अरूलाई पनि उनी मेहन्दी लगाइदिने गर्छिन् । साउनमा आफ्नो पति वा प्रेमीको नाममा मेहन्दी लगायो भने राम्रो हुन्छ भन्ने जनविश्वास रहेकाले आफूले आफ्नो हुनेवाला पतिको नाममा मेहन्दी लगाउने गरेको फेसन डिजाइनर वर्षाले जानकारी दिइन् ।
दोहोरी गायिका देविका केसी गुरुङले एक साताअगाडि कुपन्डोलस्थित जुम अरेबिक मेहन्दी प्लस स्पा नेल्स एकेडेमी विथ ब्युटी पार्लरमा गएर हातमा मेहन्दी भरिसकेकी छन् । तीजको एउटा गीतमा म्युजिक भिडियोमा छायांकन गर्न कतारबाट नेपाल आएकी देविकाले त्यहाँ गएर अरेबिक स्टायलको मेहन्दी लगाएकी हुन् । साउनसम्म नेपालमा बस्न नभ्याउने भएकाले उनले साउन आउन करिब एक साताअगाडि नै मेहन्दी लगाउन त्यहाँ पुगेकी हुन् ।
देविकाजस्तै पार्लरमा मेहन्दी लगाउने ट्रेन्ड हिजोआज बढ्दो छ । दिनमा ३५ देखि ४० जनासम्म मेहन्दी लगाउन आउने गरेको जुमकी सञ्चालक जुनु चक्रधरको भनाइ छ । एकजनालाई मेहन्दी लगाउन करिब २० मिनेटदेखि दुई घन्टासम्म लाग्ने गर्छ । उनका अनुसार मेहन्दी लगाउन आउनेमा बढीजसो युवती नै हुन्छन् भने केही वयस्क महिला पनि आउने गर्छन् । कामकाजी महिला हुन् वा गृहिणी, अधिकांशलाई साउनमा मेहन्दी लगाउने रहर हुन्छ । त्यसैले कोही घरमै इन्टरनेटमा विभिन्न डिजाइन हेरेर आफ्नो हातमा मेहन्दी लगाउँछन् त कोही पार्लरमै गएर लगाउने गर्छन् ।
पहिले भारतीय डिजाइनहरू बढी प्रचलनमा रहे पनि अहिले पाकिस्तानी र अरेबिक डिजाइन बढी चल्तीमा रहेको जुनुको भनाइ छ । 'अरेबिक डिजाइन अरूभन्दा सफा र कलात्मक हुन्छ । हल्का र गाडा रङको सम्मि श्रण मिलाउनुपर्ने हुनाले लगाउँदा धेरै ध्यान दिनुपर्ने हुन्छ', उनले भनिन् । सर्वसाधारणदेखि सेलिब्रेटी पनि साउनको अवसर पारेर मेहन्दी लगाउन उनको पार्लरमा पुग्ने गर्छन् ।
साउनमा शृंगार पनि अन्य समयमा भन्दा अलि विशेष हुन्छ । त्यसमा पनि हिजोआज त एक महिना अगाडिदेखि नै तीज मनाउने चलनले गर्दा मेहन्दीका साथै मेकअपका लागि पनि धेरै पार्लरमा आउने गरेका जुनुले बताइन् । 'तीजको दर पनि साउनदेखि नै सुरु हुने भएकाले यो समयमा रातो र हरियो बढी प्रयोग हुन्छ', उनले भनिन् । साउन महिनामा मेकअपसँगै ड्रेसअपमा पनि धेरैले हरियो रोज्ने गर्छन् । कृषिप्रधान देश नेपालमा साउन महिनामा प्रकृति पनि हरियै हुने भएकाले यहीसँग मिल्दोजुल्दो पहिरनमा सजिने महिलाको हरियै रूप निकै सुन्दर र आकर्षक देखिन्छ ।
साउने शृंगार
गर्मी र झरीको महिनामात्रै नभई साउनलाई हिन्दु नारी हरियो रङमा सजिने महिनाका रूपमा पनि बुझिन थालेको छ । यो महिनामा धेरै गर्मीका साथै झरी पनि पर्ने भएकाले वाटरप्रुफ र स्वेटप्रुफ मेकअप गर्नु उपयुक्त मानिन्छ । त्यसैले मेकअप गर्नुअगाडि प्राइमर लगाएर करिब पाँच मिनेटजति त्यसै छाड्नुपर्छ । त्यसपछि सुक्खा छाला भएकाहरूले मोइस्चराइजर लगाएर त्यसमाथि एसपीएफ ५० को सनस्क्रिन क्रिम लगाउनु उपयुक्त हुन्छ । यसलाई राम्ररी दलिसकेपछि फाउन्डेसन लगाई त्यसमाथि स्वेट प्रुफ कम्प्याक्ट लगाउनुपर्छ । साउनमा आँखाको मेकअप गर्दा हल्का हरियो खालको आई स्याडो लगाउँदा राम्रो हुन्छ । त्यसपछि गाजल र मस्कारा लगाएर अन्तिममा आफूलाई सुहाउँदो रङको लिपस्टिक लगाएपछि साउने शृंगारमा आफूलाई सजाउन सकिन्छ।
-प्रतीक्षा खड्का, हारती अनमोल ब्युटी पार्लर, डिल्लीबजार
साउने मेहन्दीमा पहिले भारतीय डिजाइन बढी प्रचलनमा रहे पनि अहिले पाकिस्तानी र अरेबिक डिजाइन बढी चल्न थालेको छ । अरेबिक डिजाइन अरूभन्दा सफा र कलात्मक हुन्छ । हल्का र गाढा रङको सम्मि श्रण मिलाउनुपर्ने हुनाले लगाउँदा धेरै ध्यान दिनुपर्छ ।
-जुनु चक्रधर -सञ्चालिका, जुम
प्रतिक्रिया दिनुहोस !
