प्रेमको गरेको निहुँमा छोरीलाई निर्घात कुटपिट गर्ने बाबु पक्राउ

बुटवल : प्रेम गरेको नाममा छोरीलाई निर्घात कुटपिट गर्ने रुपन्देही मर्चवार डिहुलीका इन्नर अहिरलाई प्रहरीले गएराति नै पक्राउ गरेको छ। 

प्रहरीले युवती सहित उनका प्रेमीलाई पनि अनुसन्धानका लागि भन्दै नियन्त्रणमा लिएको छ । छोरी मिना र प्रेमी दिनेश लोधलाई थप अनुसन्धानका लागि मर्चवार इलाका प्रहरी कार्यालयमा लगिएको छ ।

प्रहरी कार्यालयका निमित्त प्रमुख नरिश्वर अर्यालले रुपन्देही प्रहरी प्रमुखको निर्देशनपछि सार्वजनिक मुद्धा चलाउन लागिएको बताउनुभयो । घटनाको विषयमा थप अनुसन्धानका लागि घटनामा संलग्नहरुसंग सोधपुछ भइरहेको उहाँले बताउनुभयो ।

असार १९ गते डिहुलीका मिनालाई दलित युवा दिनेश लोधसंग प्रेम सम्बन्ध राखेको भन्दै परिवारका सदस्यले कुटेको भिडियो सार्वजनिक भएपछि विहीबार घटना बाहिर आएको थियो ।

वालविवाह व्याप्त रहेको मर्चवारमा सानै उमेरमा विहे हुने गरेको छ । प्रेम सम्बन्धमा बाधिका लोध र यादवको अरु संगै विबाह भइसकेको छ । तर गौना गएका छैनन् । किशोरीले श्रीमान रोज्न नपाइने भएकै कारण अरु युवासंग युवतीहरु प्रेममा बाधिने गरेका छन् ।

प्रेमसम्बन्धपछि नियमित भेटघाट गरेको जानकारी पाएका परिवारका सदस्यले कुटपिट गरेका ह्ुन । उनीहरुले शुरुमा प्रेमी लोधमा नियन्त्रणमा राखेका थिए । किशोरी यादवले उसको गल्ती नभएको भन्दै बचाउन पुग्दा बाबुबाटै कुटिएकी हुन् ।

प्रहरीले असार २० गते छोरी कुट्ने बाबुलाई छाडेको थियो । गाउपालिका अध्यक्षको रोहबरमा छाडिएको प्रहरीले जनाएको छ । प्रहरीले मानसिक रोगी भएकाले थुनामा राख्न नसकिएको स्पष्टोत्ति दिदै आएको छ ।

घटना सार्वजनिक भएपछि मानवअधिकारकर्मीहरुले चासो दिएका छन् । मानवअधिकार आयोग बुटवल उपक्षेत्रीय कार्यालयको टोली घटनाको अध्ययनको लागि मर्चवार पुगेको छ ।

प्रेमका नाममा युवतीमाथि निर्घात कुटपिट (भिडियो)