कैलाली : कान्द्रा नदीमा नुहाउने क्रममा शुक्रबार अपराह्न दुई बालकको डुबेर मृत्यु गएको छ । नदीमा नुहाउन गएका घोडाघोडी नगरपालिका-१० का १५ वर्षीय सुरेशसिंह कठायत र बझाङ मष्टा घर भई घोडाघोडी नगरपालिकास्थित मामा घर आएका १८ वर्षीय सुरेश धामीको मृत्यु भएको जिल्ला प्रहरी कार्यालय कैलालीले जनाएको छ ।
यसैबीच झापाको बिर्तामोड-भद्रपुर सडकखण्डको हर्चानामा शुक्रबार भएको सवारी दुर्घटनामा मोटरसाइकल चालक बिर्तामोड नगरपालिका–८ निवासी कृष्ण थापाको मृत्यु भएको छ ।
घटनामा थापा र सोही स्थान बस्ने ३२ वर्षीय गोविन्द चौधरी घाइते भएको जिल्ला प्रहरी कार्यालयले जनाएको छ । बिर्तामोडबाट चन्द्रगढीतर्फ आइरहेको बा १० च ४०८१ नंको कारले विपरीत दिशाबाट गइरहेको मे २ प ९०६८ नंको मोटरसाइकललाई ठक्कर दिएको थियो ।
उपचारका क्रममा बिएण्डसी हस्पिटल बिर्तामोडमा मोटरसाइकल चालक थापाको मृत्यु भएको प्रहरीले जनाएको छ । घटनापछि ठक्कर दिने कार चालक टंकप्रसाद रिजाललाई प्रहरीले नियन्त्रण लिएको बताइएको छ । रासस
प्रतिक्रिया दिनुहोस !
