८५ हजार रकमसहित १२ जुवाडे पक्राउ
भक्तपुर : भक्तपुर प्रहरीले पचासी हजार एक सय नब्बे रुपैयाँसहित १२ जना जुवाडेलाई नियन्त्रणमा लिएको छ ।
विशेष सुराकीको आधारमा भक्तपुर प्रहरीले शनिबार राती मध्यपुर थिमी नगरपालिका १ लोकन्थलीस्थित ४४ वर्षीय सुदर्शन विष्टको घरबाट उनीहरुलाई नियन्त्रणमा लिएको हो ।
महानगरीय प्रहरी परिसर भक्तपुरका प्रवक्ता प्रहरी नायब उपरीक्षक कृष्ण प्रसाईंले पक्राउ परेकाहरुको साथबाट १५ बुक ताससमेत बरामद भएको जानकारी दिनुभयो ।
‘सुदर्शन बिष्टले आफ्नै घरमा अवैध रुपमा पैसाको हारजीत हुने गरी तास खेल्ने खेलाउने कार्य गर्दै आइरहेको भन्ने सूचनाको आधारमा घरमा छापा मारेका हौं’, उहाँले भन्नुभयो, ‘छापा मार्ने क्रममा तास खेल्ने र खेलाउने कार्यमा संलग्न १२ जना व्यक्तिहरुलाई तास बुक थान १५ र नगद पचासी हजार एक सय नब्बे बरामद भएको हो ।’
उहाँका अनुसार नियन्त्रणमा लिइएकाहरुलाई महानगरीय प्रहरी परिसर भक्तपुरमा राखिएको छ । उनीहरुमाथि आवश्यक थप अनुसन्धान कार्य भइरहेको परिसरले जनाएको छ ।
प्रतिक्रिया दिनुहोस !
