रुस, इरान र उत्तरकोरियामाथि नाकाबन्दी लाउन आज अमेरिकी संसदमा मतदान हुने

वासिङटन : रुस, उत्तर कोरिया र इरानमाथि नाकाबन्दी गर्ने सम्बन्धमा अमेरिकी संसदमा मङ्गलबार मतदान हुदैछ । इरान र उत्तर कोरियामाथि यसअघि पनि नाकाबन्दी जारी नै छ । तर त्यसमा पनि थप नाकाबन्दीका लागि अमेरिकी संसदमा विधेयक लगिने भएको हो ।

त्यसैगरी रुसका बवरुद्धमा पनि यसअघि नै पूर्व राष्ट्रपति बाराक ओबामाको प्रशासनले केही क्षत्रेमा नाकाबन्दी लगाएको थियो । डोनाल्ड ट्रम्प अमेरिकाको राष्ट्रपतिमा निर्वाचित भएपछि पनि त्यसलाई हटाएका थिएनन् ।

यो पछिल्लो विधेयक अमेरिकी राष्ट्रपति डोनाल्ड ट्रम्पका अधिकार कटौती गर्नै उद्देश्यले आएको हो । यस विषयमा गएको दुई हप्तादेखि अमेरिकी संसदमा व्यापक मात्रामा बहस जारी छ ।

उत्तर कोरिया र इरानका लागि गरिएको यो नयाँ नाकाबन्दी खासगरी पछिल्लो समयमा उत्तर कोरियाले जारी राखेको आणविक परीक्षणको विरुद्धमा लक्षित छ ।

साथै रुसका लागि लक्षित नाकाबन्दी ट्रम्पले रुसका पक्षमा गर्नसक्ने कुनै पनि निर्णयको अधिकार कटौतीका लागि ल्याइएको हो । यो विधेयक पारित भएमा ट्रम्पको अधिकारमाथि कांग्रेसको अङ्कुश कायमै रहने छ ।

यस विधेयकमा राष्ट्रपति ट्रम्पले पनि प्रारम्भिक रुपमा सहमति जनाएका छन्। उनले यस विषयमा आफू सहमत भएको कुरा प्रारम्भिक रुपमा भने पनि मतदानको प्रक्रियासम्म रिपब्लिकन र डेमोक्र्याटको सहमतिको आधार के हुन्छ भन्ने बारेमा केही खुलेको छैन ।

गत महिना पनि सिनेटमा रुसका विरुद्धमा नाकाबन्दी गर्ने विषयमा मतदान भएको थियो । रुसमाथि कडा खालको नाकाबन्दी लगाउने विषयमा भएको सो मतदानमा सो प्रस्तावको पक्षमा मत प्रकट भएको थियो ।

त्यस समय विषयवस्तु नखुलाइएको भए पनि रुसका विरुद्धमा कडा प्रकारको नाकाबन्दी गर्ने भनी गरिएको मतदानमा रुसका विपक्षयमा अत्यधिक मात्रामा मतदान र सहमति भएकोले यो वर्तमान विधेयकको आधार बनेको अधिकारीहरुको भनाई छ ।

यस विषयमा अमेरिकी काँग्रेसमा शनिबार सहमति भएको हो । सो सहमतिमा रुसमाथि नाकाबन्दी गर्ने बारेमा राष्ट्रपति ट्रम्पको दल रिपब्लिकन र डेमोक्र्याटहरु समेतले सहमति गरेका छन् ।

यो पछिल्लो विधेयकले हालैका दिनमा अमेरिकी राष्ट्रपति ट्रम्पको रुसी प्रशासनसँग बढ्दै गएको भनिएको सम्बन्ध थप अघि नबढोस भनी ल्याइएको पनि अनुमान गरिएको छ ।

खासगरी गत बर्ष भएको अमेरिकी राष्ट्रपतिको निर्वाचनका समयमा प्रजातान्त्रिक प्यानलका प्रत्यासी हिलारी क्लिन्टनलाई हराउन रुसी अधिकारीहरुले गरेको भनिएका गोप्य पत्राचारका विषयमा सिनेटमा राष्ट्रपति ट्रम्पका छोरालाई उपस्थित हुन निर्देशन दिएका बेला अमेरिकी संसदमा यो बिधेयक ल्याइएको छ ।

त्यसैगरी हालैमात्र अमेरिकी राष्ट्रपति डोनाल्ड ट्रम्पले रुसी राष्ट्रपति भ्लादिमिर पुटिनसँग गोप्य वार्ता गरेको भनी अमेरिकामा व्यापक विरोध भइरहेको छ ।

यो विधेयक आउस अफ रिप्रिजेन्टेभिमा पारित भएपछि आगामी अगष्ट महिनाको अन्त्यतिर फेरि अन्तिम पारित गर्ने प्रक्रियाको लागि सिनेटमा नै फिर्ता पठाइने छ ।

यो विधेयकमा शनिबार भएको दुवै पार्टीको सहमतिले आगामी दिनमा रिपब्लिकन र डेमोक्र्याटहरु सँगसँगै र एकै आवाजका साथ काम गर्न तयार भएको पनि सन्देश दिएको बताइएको छ । रासस/एएफपी