कर्णाली राजमार्गको पहिरो हटाउने कार्य सुस्त, यात्रु आक्रोशित

जुम्ला : आइतबार राति कर्णाली राजमार्गमा गएको पहिरो हटाउने कार्य सुस्त गतिमा चलिरहेको छ । कालिकोटको एसमोडदेखि दहीखोलामसम्म डेढ दर्जन बढी ठाउँमा पहिरो गएपनि पहिरो पन्छाउने कार्य सुस्त गतिमा चलेको छ । कालिकोटको कालिका गाउँपालिका वडा नम्बर १ देखि दैलेखको दहीखोलासम्म करिब १८ ठाउँमा पहिरो खसेको जिल्ला प्रहरी कार्यालय कालिकोटले जनाएको छ ।

दैनिक दर्जनौं गाडीमा याुत्रहरु आहोरदोहोर गर्ने यस राजमार्गको पहिरो हटाउने कार्य सुस्त गतिमा चलेका कारण अझै दुई-तीन दिनसम्म राजमार्ग खुल्न नसक्ने देखिएको छ । राजमार्गमा हाल सडक डिभिजन कार्यालय कालिकोटका दुईवटा स्काभेटरले पहिरो पन्छाउने कार्य गरिरहेका छन् । बीचमा नयाँ ट्रयाक नै खोल्नुपर्ने र ठूलो पहिरो गएका कारण अँझै केही दिनसम्म पहिरो पन्छाउन नसक्ने देखिएको जिल्ला प्रहरी कार्यालय कालिकोटले जनाएको छ । पहिरो ठूलो भएका कारण जुम्लाबाट ठूलो स्काभेटर पठाउने भनिएपनि मंगलबार साँझसम्म पुग्न सकेको छैन ।

जिल्ला प्रशासन कार्यालय कालिकोटका अनुसार पाँच किलोमिटर सडकखण्ड पहिरोका कारण अबरुद्ध भएको छ । एसमोड र घट्टेखोला बीचमा रहेको गोगने खोलामा १० मिटरजति सडक खण्ड पूरै खसेका कारण नयाँ ट्रयाक नै खोल्नुपर्ने प्रहरी निरीक्षक राजेन्द्र श्रेष्ठले बताए । उनका अनुसार साना दुईवटा स्कोभेटरले मंगलबारसम्म केही ठाउँमा मोटरसाइलसम्म छिर्नसक्ने पहिरो पन्छाएपनि करिब ८० प्रतिशत भन्दाबढी पहिरो पन्छाउन बाँकी नै छ । वर्षात नरोकिएकाले पहिरो पन्छाएको ठाउँमा पुन ढंगा माटो खस्ने क्रम जारी रहेका कारण समस्या देखिएको छ । ‘स्काभेटरले पहिरो पन्छाउँदै गएको छ, तर निरन्तर वर्षातले पुन माटो खस्न थालेपछि समस्या उत्पन्न भएको छ ,’ उनले भने ।

घट्टेखोला र दहीखोलामा गएको पहिरो सानो स्काभेटरले पन्छाउन सम्भावना नभएको पहिरो पन्छाउने कार्यमा संलग्न प्रहरीलाई उदृत गर्दै जिल्ला प्रहरी कार्यालय कालिकोटले जनाएको छ । सुर्खेत र जुम्लादेखि ठूला स्काभेटर अँझैसम्म पुगेका छैनन् । जसका कारण राजमार्ग अबरुद्ध भएपछि सयौं यात्रुहरु बाटैमा अलपत्र परेका छन् । जुम्ला तथा कालिकोटबाट सुर्खेत हुँदै नेपालगञ्ज जाने यात्रुहरु कालिकोटको हुम्मदेखि दहीखोलासम्म करिब १० किलोमिटर बढी हिडेर पुग्ने र अर्को गाडी चढ्ने गरेका छन् । बाटो पन्छाउने काममा ढिलाई गरेका कारण यात्रुहरुलाई समस्या परेको काठमाडौंदेखि जुम्ला आउँदै गरेका जुम्लाका मयदाल देवकोटाले बताए । पहिरो पन्छाउने कार्यमा यात्रुहरुले पनि सहयोग गरिरहेपनि सरोकारवाला निकायबाट हालसम्म तीव्र गतिमा काम नभएको उनले गुनासो पोखे । निरन्तर बाटोमा वर्षात भइरहेकोले यात्रुहरुलाई विभिन्न रोगको संक्रमण हुनुका साथै सामानहरु समेत हराउने भन्दै आक्रोश पाखे ।

यसअघि पनि घट्टेखोलामा पुल नभएका कारण हरेक वर्षातको समयमा सवारी साधनहरु केही दिनसम्म जाममा पर्ने गरेका् थिए । पुलको कामको ठेक्का लिएका ठेकेदार पुल नै नबनाइकन भागेका कारण अधिकांश खोलामा पहिरोको जोखिम देखिएको चालकहरु बताउँछन् । बाटो अवरुद्ध हुँदा आफूहरुलाई खान र बस्नको लागि समस्या भएको सुर्खेतदेखि मगुका लागि हिँडेका यात्रु रणवीर कुँवरले बताए । मार्गका लागि अर्बौ रकम खर्च गरेपनि ढुक्कसँग हिड्न सक्ने अवस्था नभएको भन्दै कुँवरले आक्रोश पोखे । सुर्खेतदेखि दुईदिनको यात्रा तय गरेर सवारी चढेपनि पहिरोका कारण एकहप्ता लाग्ने देखिएको उनको भनाइ छ । राजमार्ग अबरुद्ध हुँदा जुम्ला, मुगु र कालिकोटदेखि सुर्खेत हुँदै नेपालगन्जतर्फ हिँडेका र नेपालगन्जबाट सर्खुेत हुँदै जुम्लासम्म आउँदै गरेका सवारी साधनहरु बाटोमै रोकिएका छन् । सवारीसाधन नचल्दा यात्रुहरु बाटोमा अलपत्र परेका छन् ।

विसं २०६३ सालमा ट्रयाक खुलेको कर्णाली राजमार्गको स्तरोन्नतिमा ध्यान नपुग्दा प्रत्येक वर्ष कर्णाली वासीले सास्ती भोग्नुपरेको छ । राजमार्ग सञ्चालनमा आएदेखि हवाई यातायात सञ्चालनमा कमी आएको छ । तर वर्षातमा हवाई याताया पनि नचल्ने र पहिरोका कारण सडक यात्रा जोखिम हुने भएकाले कर्णाली वासीले निकै सास्ती व्यहोर्नु परेको छ ।

राजमार्गको ट्रयाक खुलेपछि एकपटकको समान्य कालोपत्रे बाहेक अन्य स्तरोन्ती हुन सकेको छैन । बोटोमा रहेका ढुंगाहरु पन्छाउन नसक्दा वर्षेनी पहिरोका कारण दर्जनौं यात्रुले ज्यान समेत गुमाउनु परेको छ । राजधानी नजिकैका बाटोमा सामान्य पहिरो आउँदा समेत सरकारको ध्यान पुग्ने तर कर्णाली राजमार्गमा पहिरो जाँदा यात्रुहरुको हालत समेत नबुझ्ने भन्दै कर्णालीबासीले आक्रोश पोखेका छन् । यस्तै बाटोमा अधिकांश पहिरो आउने खोलामा पुल निर्माण नहुँदा समान्य रुपमा बनाएको बाटो पहिरोका कारण विग्रने र राजमार्ग अबरुद्ध हुने गरेको छ ।