बाल विकास बन्यो च्याम्पियन
भक्तपुर : जिल्लाव्यापी विद्यालयस्तरीय कोकाकोला कप छनोट फुटबल प्रतियोगिताको उपाधि बाल विकास इंगलिस स्कुलले जितेको छ ।
भक्तपुर जिल्ला फुटबल संघद्वारा आयोजित प्रतियोगिताअन्तर्गत बिहीबार भएको फाइनलमा देवी माध्यमिक विद्यालयलाई ३–० गोलले पन्छाउँदै बाल विकास च्याम्पियन भएको हो ।
प्रतियोगिताको विजेता बाल विकास क्षेत्रीय प्रतियोगिताको लागि छनोटसमेत हुन सफल भएको छ ।
खेलको दोस्रो मिनेटमै गोल गरेर लिएको अग्रतालाई बचाउन नसक्दा देवी बाल विकासलाई उल्टै नतिजा सुम्पन बाध्य भएको थियो । उसको लागि सागर तामाङले सुरुवाती गोल गरेका थिए ।
उक्त गोलको ६ मिनेटपछि नवीन रानाले गोल गरेर बाल विकासलाई बराबरीमा ल्याए । खेलको पहिलो हाफमा १–१ गोलको बराबरीमा टुंगिएको थियो ।
दोस्रो हाफमा देवीका खेलाडीले गोल राम्रो अवसरसमेत सदुपयोग गर्न सकेनन् । तर नवीन फुदोङले सात मिनेटको फरकमा खेलको ४१ औं र ४८ औं मिनेटमा दुई गोल गर्दै बाल विकासको जीत सुनिश्चित गरे । उनले पहिलो गोल फ्रि किकमार्फत गरेका थिए । देवीका खेलाडीको ह्याण्डवापत पाएको फ्रि किकको बललाई उनले जाली चुमाएका हुन् ।
प्रतियोगिताका विजेता तथा उपविजेता खेलाडी तथा विद्यालयलाई भक्तपुर नगर खेलकुद समितिका संयोजक उकेश कवांले प्रमाणपत्र, पदक तथा शिल्ड वितरण गरेका थिए ।
प्रतियोगिताको समापन कार्यक्रममा भक्तपुर जिल्ला फुटबल संघका अध्यक्ष गौतम सुजखू, प्रतियोगिता संयोजक तीर्थरत्न राजचल र रामकृष्ण प्रजापतिले यस वर्षको क्षेत्रीय प्रतियोगितासमेत भक्तपुरमै हुने जानकारी दिए ।
प्रतिक्रिया दिनुहोस !
