भारोत्तोलनलाई करोडौंको खेल सामग्री सहयोग

काठमाडौं : नेपालमा पहिलो पटक आयोजना भएको युथ एन्ड जुनियर एसियन भारोत्तोलन च्याम्पियनसिप शुक्रबार सम्पन्न भएको छ । एसियाका ३० राष्ट्र सहभागी च्याम्पियनसिप नेपाल भारोत्तोलन संघले सफलतापूर्वक सम्पन्न गरेको हो । च्याम्पियनसिपको समापनसँगै संघका लागि नयाँ चुनौती पनि थपिएको छ, च्याम्पियनसिपका लागि आएका सामानको व्यवस्थापन ।

च्याम्पियनसिपका लागि अन्तर्राष्ट्रिय भारोत्तोलन महासंघ, एसियाली भारोत्तोलन महासंघ र चीनको भारोत्तोलन संघले उपलब्ध गराएका सामग्री कहाँ राख्ने भन्ने चुनौती संघलाई थपिएको छ । नेपाल भारोत्तोलन संघका महासचिव पार्थ सारथिसेन गुप्त पनि सामग्री व्यवस्थापनका लागि संघलाई चुनौती रहेको बताउँछन् । 'संघमा सामान राख्ने ठाउँ नै छैन । त्यसका लागि बढी स्पेस भएको ठाउँ आवश्यक पर्छ । यसका लागि संघले उपयुक्त ठाउँको खोजी गरिरहेको छ', गुप्तले भने । उनले केही दिनभित्रै ठाउँ खोजेर सामग्रीको व्यवस्थापन गरिने बताए ।

च्याम्पियनसिपका लागि अन्तर्राष्ट्रिय भारोत्तोलन महासंघ, एसियाली भारोत्तोलन महासंघ र चीनको भारोत्तोलन संघले वेट लिफ्टिङ सेट, बार वेललगायतका सामग्री तीन महिनाअघि नै नेपाल पठाएका थिए । यसैगरी एसियन सिनियर भारोत्तोलन च्याम्पियनका लागि सन् २०१५ मै केही सामान नेपाल आएको थियो । केही सामान अझै आउन बाँकी रहेकाले सातदोबाटोको ट्रेनिङ हलमा नअट्ने भएपछि व्यवस्थापनमा समस्या देखिएको महासचिव गुप्तले बताए ।

'सिनियर एसियन च्याम्पियनसिपका लागि धेरै सामान सन् २०१५ मै नेपाल आएको थियो । अहिलेको प्रतियोगिताका लागि तीन महिनाअघि पनि केही सामान आएको छ । अझै केही सामान आउन बाँकी नै छ', उनले भने, 'यी सामानले धेरै ठाउँ ओगट्ने भएकाले व्यवस्थापन गर्न समस्या छ ।' उनले २०७२ वैशाख १२ गतेको विनाशकारी भूकम्पका कारण सिनियर एसियन च्याम्पियनसिप आयोजना गर्न नसक्दा उक्त प्रतियोगिताका लागि आएका सामानहरू पनि गोदामै थन्किएको बताए ।

जिल्लामा भने सधैं अभाव

विभिन्न प्रतियोगिताका क्रममा विदेशबाट आएका सामान काठमाडौंस्थित नेपाल भारोत्तोलन संघको गोदाममै थन्किने गरेका छन् । तर खेलाडी उत्पादनको दृष्टिकोणले निकै महत्वपूर्ण मानिने जिल्लामा भने सधैं खेल सामग्रीको अभाव हुने गरेको छ । संंघका सदस्य एवं प्रशिक्षक दिनेश भुजेलले विदेशबाट आएका खेल सामग्री बाहिरका जिल्लालाई नदिने र काठमाडौंमै थन्काएर राख्दा खेलाडी उत्पादनमा समेत समस्या परेको बताए ।

'विदेशबाट आएका सबै सामान काठमाडौंमै थन्काएर राख्ने गरिन्छ । खेलाडी उत्पादन गर्ने जिल्लामा सामान हुँदैन । अर्कोतिर, राजधानीमा गोदाममा लामो समयदेखि थन्किएर रहेका खेल सामग्री नष्ट भएको समाचार पनि सुनिन्छ', भुजेलले भने । उनले दुई वर्षअघि र अहिले गरी दुई करोड रुपैयाँभन्दा बढीको सामान नेपाल आएको बताउँदै गोदाममा थन्काउनुभन्दा जिल्लालाई बाँड्न सुझाव दिए ।

'सबैको ध्यान उपत्यकाका जिल्लामा मात्र केन्द्रित हुने गरेको छ । यो प्रवृत्तिलाई नचिरेसम्म जिल्लामा खेलाडी उत्पादन हुन सक्तैन', भुजेलले अन्नपूर्ण पोस्टसँग भने, 'बाहिरी जिल्लामा न खेलाडीलाई अभ्यास गराउने सुविधासम्पन्न ट्रेनिङ हल छ, न त अभ्यास सामग्री नै । इन्डोर खेल भए पनि हामीले खेलाडीलाई बाहिरी मैदानमै अभ्यास गराउनुपर्ने बाध्यता छ ।'

भुजेलले सरकारको बेवास्ताका कारण नेपालमा भारोत्तोलन खेल ओझेलमा परेको गुनासो पनि गरे । 'अन्य खेलको तुलनामा भारोत्तोलन पदकको सम्भावना बढी भएको खेल हो तर, पछिल्लो समय यो खेललाई राज्यले बेवास्ता गरिरहेको छ । पदकको सम्भावना भएको खेललाई राज्यले प्राथमिकतामा राख्न सकेको छैन', उनले भने, 'पदकीय दृष्टिकोण महत्वपूर्ण खेलहरूको प्राथमिकता निर्धारण नगरिएसम्म नेपाली खेलकुदले अन्तर्राष्ट्रिय प्रतियोगिताहरूमा अपेक्षित सफलता हात पार्न गाह्रो छ ।'