'अमेरिका उत्तर कोरियाली क्षेप्यास्त्रको सीमाभित्र'

सोल : पछिल्लो अन्तरमहादेशीय ब्यालिस्टिक क्षेप्यास्त्र परीक्षणलाई उत्तर कोरियाले सफल दाबी गर्दै यो अमेरिकाकालाई 'चेतावनी' दिन गरिएको परीक्षण भएको जनाएको छ ।उत्तर कोरियाली राष्ट्रपति किम जोङ उनले परीक्षणले उत्तर कोरियाको सारा अमेरिकाभर क्षेप्यास्त्र प्रहार गर्न सकिने क्षमता प्रमाणित गरेको गर्वका साथ बताएको कोरियाली केन्द्रीय समाचार संस्था (केसीएनए)ले उल्लेख गरेको छ । केसीएनएले भनेको छ, 'हाम्रा नेताले गर्वका साथ भन्नुभएको छ कि अमेरिकाको सम्पूर्ण क्षेत्र अब प्योङयाङको क्षेप्यास्त्र प्रहारको पहुँचमा आएको छ ।'

यसैबीच अमेरिकी विदेशमन्त्रीले रेक्स टिलरसनले उत्तर कोरियाली गतिविधि उत्तेजक बन्नुमा बेइजिङ र रूस दोषी रहेको आरोप लगाएका छन् । त्यस्तै पेन्टागनका प्रवक्ता क्याप्टेन जेफ डेभीसले अमेरिका आफ्नो बचाउका लागि तयार रहेको बताए । परीक्षणपछि अमेरिकी विदेशमन्त्री टिलरसन र जापानी विदेशमन्त्री कुमिओ किसिदाबीच टेलिफोन वार्ता भएको छ ।

उत्तरका उत्तेजित गतिविधि रोक्न सम्भावित व्यापक दबाव दिनुपर्ने वार्तामा कुसिदाले अमेरिकी विदेशमन्त्रीसँग आग्रह गरेको जानकारी दिइएको छ । शनिबारको यो परीक्षणको पुष्टि गर्दै उत्तर कोरियाले क्षेप्यास्त्र ४७ मिनेटसम्म उडेको र १० हजार किलोमिटरको सैद्धान्तिक दूरीको उचाइमा पुगेको जनाएको छ । जुलाईमा मात्र उत्तर कोरियाले यो दोस्रो अन्तरमहादेशीय क्षेप्यास्त्र परीक्षण गरेको हो ।

अमेरिकी राष्ट्रपति डोनल्ड ट्रम्पले त्यसलाई 'उत्तर कोरियाली शासकको अविवेकी र खतरनाक कदम' भन्ने प्रतिक्रिया दिएका छन् । अमेरिका, जापान र दक्षिण कोरियाले प्योङयाङको पछिल्लो कारबाहीको भत्र्सना गरेका छन् । जापानी प्रधानमन्त्री सिन्जो आबेले क्षेप्यास्त्र परीक्षण आफ्नो मुलुकका लागि गम्भीर खतरा भएको बताए । त्यसैगरी दक्षिण कोरियाका राष्ट्रपति मुन जे इनले मध्यरातमा आपत्कालीन सुरक्षा बैठक बोलाई छलफल गरेका छन् । - रासस/एएफपी