बिमा कम्पनीहरूको प्रिमियम साढे ५६ अर्ब

काठमाडौं : बिमा कम्पनीहरूले आर्थिक वर्ष २०७३÷७४ मा ५६ अर्ब ५६ करोड रुपैयाँ प्रिमियम संकलन गरेका छन् । गत असार अन्त्यसम्म जीवन बिमाबाट ३८ अर्ब ४० करोड र निर्जीवन बिमाबाट १८ अर्ब १६ करोड रुपैयाँ प्रिमियम संकलन भएको हो । अघिल्लो आवमा यस्तो प्रिमियम ४६ अर्ब ५६ लाख रहेको बिमा समितिले जानकारी दिएको छ । अघिल्लो आवको तुलनामा गएको आवमा १० अर्ब बढी प्रिमियम संकलन भएको छ । पछिल्लो समयमा जोखिम बढ्दै जाँदा मानिसले बिमा गर्नुपर्ने आवश्यकता महशुस गर्न थालेका छन् । बिमा समितिका कार्यकारी निर्देशक श्रीमान् कार्कीले विस्तारै उकालो लाग्दै गरेको बिमा बजार भूकम्पयता अझ बढ्न सहयोग मिलेको जानकारी दिए ।

एनएलआईसी अगाडि

जीवन बिमा कम्पनीले अघिल्लो आवको तुलनामा गएको आवमा २० प्रतिशतले प्रिमियम बढाएका छन् । नौवटा जीवन बिमा कम्पनीले गत आर्थिक वर्ष बजार वृद्धि गरेर ३८ अर्ब ४० करोड प्रिमियम (बिमा शुल्क) संकलन गरेका हुन् । यी कम्पनीले आर्थिक वर्ष २०७२÷७३ मा जम्मा ३१ अर्ब ९७ करोडको प्रिमियम संकलन गरेका थिए ।

पहिलोपटक जीवन बिमा गर्नेबाट गएको आवमा १० अर्ब ५६ करोड प्रिमियम संकलन भएको छ भने अघिल्लो आवमा यस्तो प्रिमियम साढे नौ अर्ब संकलन भएको थियो । नौवटा बिमा कम्पनीमध्ये नेपाल लाइफ इन्सुरेन्सले सबैभन्दा बढी १२ अर्ब प्रिमिय संकलन गरेको छ । कम्पनीले गत आर्थिक वर्षमा १७ प्रतिशत बढी प्रिमियम संकलन गरेको हो । कुल प्रिमियममा नेपाल लाइफ इन्सुरेन्स कम्पनीले मात्रै साढे ३७ प्रतिशत बजार हिस्सा ओगटेको छ । कम्पनीले अघिल्लो आर्थिक वर्षमा १० अर्ब २५ करोड प्रिमियम संकलन गरेको थियो ।

धेरै प्रिमियम संकलन गर्ने अर्को कम्पनीका लाइफ इन्सुरेन्स कर्पाेरेसन नेपाल परेको छ । यो कम्पनीले आठ अर्ब ८० करोड रुपैयाँ प्रिमियम संकलन गरेको हो । यसले आफ्नो बजार २५ प्रतिशतले वृद्धि गरेको देखिन्छ । यस्तै, तेस्रो धेरै प्रिमियम संकलन गर्ने कम्पनीमा नेसनल लाइफ इन्सुरेन्स सूचीकृत भएको छ ।

उक्त चार अर्ब ९५ करोड प्रिमियम संकलन गरेको हो । नेसलन लाइफ इन्सुरेन्स कम्पनीले बजार हिस्सा २९ प्रतिशतले बढाएको देखिन्छ । कम्पनीले अघिल्लो आवमा तीन अर्ब ८४ करोड प्रिमियम संकलन गरेको थियो । जीवन बिमा कम्पनी बजारलाई आठ प्रतिशतदेखि २९ प्रतिशतसम्म विस्तार गर्न सफल भएका छन् । राष्ट्रिय बिमा संस्थानको बजार अघिल्लो आवको तुलनामा आठ प्रतिशतले मात्रै बढेको छ भने नेसनल लाइफ इन्सुरेन्सले २९ प्रतिशतले बजार बढाएको छ ।

९८ प्रतिशत बढ्यो निर्जीवन कम्पनीको प्रिमियम

आर्थिक वर्ष २०७३÷७४ मा निर्जीवन बिमा बजार २९.४६ प्रतिशतले वृद्धि भएको छ । गत वर्ष १६ वटा निर्जीवन बिमा कम्पनीले १८ अर्ब १६ करोड ९७ लाख रुपैयाँ बिमा शुल्क (प्रिमियम) संकलन गरेको बिमा समितिको तथ्यांक छ । आर्थिक वर्ष २०७२÷७३ मा ती कम्पनीले १४ अर्ब ३ करोड ४९ लाख रुपैयाँ प्रिमियम संकलन गरेका थिए ।

गएको आवमा सबैभन्दा बढी बिमा शुल्क शिखर इन्सुरेन्स कम्पनीले आर्जन गरेको छ । यो कम्पनीले दुई अर्ब ७७ करोड ४७ लाख रुपैयाँ प्रिमियम आर्जन गरेको हो । यो रकम अघिल्लो आर्थिक वर्षको तुलनामा ३८.४२ प्रतिशत बढी हो ।

बिमा शुल्क आर्जनका हिसाबले सिद्धार्थ इन्सुरेन्स कम्पनी दोस्रो स्थानमा सूचीकृत भएको छ । यस कम्पनीले गत आर्थिक वर्षमा एक अर्ब ५० करोड २५ लाख रुपैयाँ बिमा शुल्क संकलन गरेको छ । यो रकम अघिल्लो आर्थिक वर्षको तुलनामा २८.८८ प्रतिशत बढी हो । कम्पनीले अघिल्लो आवमा एक अर्ब १६ करोड ५८ लाख रुपैयाँ प्रिमियम संकलन गरेको छ ।

बिमा शुल्कका आधारमा सगरमाथा इन्सुरेन्स कम्पनी तेस्रो स्थानमा छ । यस कम्पनीले गत आर्थिक वर्ष एक अर्ब ४० करोड ९२ लाख रुपैयाँ बिमा शुल्क आर्जन गरेको छ । यो रकम अघिल्लो आर्थिक वर्षको तुलनामा २६.७२ प्रतिशत बढी हो । उक्त कम्पनीले समीक्षा वर्षमा एक अर्ब ११ करोड १२ लाख प्रिमियम संकलन गरेको थियो ।

पहिलो स्थानमा रहेको शिखर र दोस्रो स्थानमा रहेको सिद्धार्थ इन्सुरेन्सबीचको बिमा शुल्क आर्जनअन्तर एक अर्ब २७ करोड रुपैयाँ छ । तर, दोस्रो स्थानमा रहेको सिद्धार्थ र तेस्रो स्थानमा रहेको सगरमाथा इन्सुरेन्सबीचको बिमा शुल्क आर्जनअन्तर करिब १० करोडमात्रै छ ।

बिमा शुल्क आर्जनतर्फ सबैभन्दा उच्च दरको वृद्धि एनबी इन्सुरेन्सले गरेको छ । यसले अघिल्लो आर्थिक वर्षको तुलनामा ९८.५ प्रतिशतले वृद्धि गरी ६९ करोड ४७ लाख रुपैयाँ बिमा शुल्क आर्जन गरेको छ । नेको इन्सुरेन्सले ५० दशमलव ३९ प्रतिशतको वृद्धि हासिल गरी एक अर्ब ३६ करोड रुपैयाँ बिमा शुल्क संकलन गरेको छ ।

१६ वटा निर्जीवन बिमा कम्पनीमध्ये नौवटा कम्पनीले एक अर्बभन्दा बढी बिमा शुल्क आर्जन गरेका छन् । त्यसमा शिखर, सिद्धार्थ, सगरमाथा, एनएलजी, नेको, प्रिमियर, प्रुडेन्सियल, हिमालयन जनरल, लुम्बिनी जनरल इन्सुरेन्स कम्पनी छन् ।
नेपाल इन्सुरेन्स कम्पनी, दी ओरिएन्टल इन्स्योरेन्स, नेसनल इन्स्योरेन्स, युनाइटेड, एभरेस्ट, प्रभु, एनबी इन्सुरेन्सको प्रिमियम अर्बभन्दा कम छ ।

पुनर्बिमातर्फ नेपाली बजारमा एकाधिकार प्रयोग गर्दै आएको नेपाल पुनर्बिमा कम्पनीको बजार भने २२ दुई ३२ प्रतिशतले मात्र बढेको छ । यस कम्पनीले दुई अर्ब नौ करोड रुपैयाँको प्रिमियम संकलन गरेको छ । अघिल्लो वर्ष कम्पनीले एक अर्ब ७१ करोड बिमा शुल्क संकलन गरेको थियो ।