काठमाडौं : ७० बर्षीय दुर्गे कामीले आफूलाई उच्च शिक्षा अध्ययनका लागि वातावरण मिलाइदिन सरकारसँग आग्रह गरेका छन् । उपप्रधान तथा परराष्ट्रमन्त्री कृष्णबहादुर महरासँग उनकै कार्यकक्ष सिंहदरबारमा आइतबार भेट गरी कामीले उच्च शिक्षा अध्ययनका लागि वातावरण मिलाई दिन अनुरोध गरेका हुन् ।
परराष्ट्र मन्त्रालायमा मन्त्री महरालाई भेटी स्याङ्जाको श्री काला भैरव माविबाट एसइई परीक्षा पास गरेको जानकारी गराउँदै कामीले थप अध्ययनका लागि सहयोग गरिदिन आग्रह गरेका हुन् ।
दुर्गे कामीले मन्त्री महरासँग भने, ‘मलाई ११–१२ कक्षा पढ्ने इच्छा छ, यसका लागि सहयोग आग्रह गर्न चाहन्छु ।’ आफू सानो छँदा विद्यालय जान नपाएको गुनासो पनि उनले मन्त्री महरालाई सुनाए ।
जवाफमा उपप्रधानमन्त्री महराले कामीको शिक्षाप्रतिको आकांक्षालाई सम्बोधन गर्ने आश्वासन दिँदै अध्ययनका लागि आवश्यक पर्ने वातावरण मिलाउन पहल गर्ने जवाफ दिए ।
एसइई परीक्षा उत्तीर्ण गरेकोमा कामीलाई बधाई दिदै मन्त्री महराले अध्ययनमा निरन्तर लाग्न प्रेरणा दिए । दुर्गे कामी ६ जनाका पिता तथा आठ जना नातिनातिनाका हजुर बुबा हुन । कामी शिक्षक बन्न चाहन्छन् ।
सोही अवसरमा दुर्गे कामीले आफ्नो छोरा नरेन्द्र सुनार विक, साउदीको जेलमा रहेको जानकारी गराउँदै नेपाल फिर्ता ल्याउने पहल गरिदिन पनि अनुरोध गरे । वैदेशिक रोजगारीको शिलशिलामा साउदी गएका छोरा विगत तीन वर्षदेखि जेलमा रहेको पनि कामीले बताए । के कारण आफ्नो आफ्नो छोरा जेलमा परेको हुन थाहा नभएको पनि कामीले बताए ।
परराष्ट्रमन्त्री महराले नरेद्रको वास्तविक अवस्थाका विषयमा जानकारी लिने र नेपाल ल्याउन पहल गर्ने जवाफ दिएका छन् ।
प्रतिक्रिया दिनुहोस !
