अस्ट्रेलियामा विमान खसाल्ने योजना असफल

सिड्नी : अस्ट्रेलियाको राजधानी सिड्नीमा एक विमानलाई उडिसकेपछि खसाल्ने गरी बनाइएको भनिएको आतंकवादी योजनालाई निस्तेज पारिदिएको जनाइएको छ ।अस्ट्रेलियाका प्रधानमन्त्री म्याल्कोम टर्नबुलले आइतबार उक्त जानकारी गराएका हुन् । उनले प्रतिआतंकवाद प्रहरीले उक्त योजनाअगावै त्यसबारेमा पत्ता लगाएको र विमान खसाल्ने एउटा योजनालाई विफल बनाइदिएको बताएका हुन् । गतराति उनीहरूले यस्तो योजना बनाएर त्यसमा संलग्नहरूको खोजी गरेका थिए । प्रहरीले त्यसमा संलगन भएको आशंकामा सिड्नी क्षेत्रमा चारवटा घरमा छापा मारेर केहीलाई पक्राउ पनि गरेको छ । आइतबार बिहान प्रहरीले चारजनालाई गिरफ्तार गरेको जनाएको छ ।

यस विषयमा अनुुसन्धान सुरु गरिएको छ । अनुसन्धानकर्ताहरूले उक्त हमलाको तयारीमा विस्फोटक सामग्रीको प्रयोग गर्ने योजना बनाइएको थाहा भएको बताएका छन् । उक्त आतंकवादी हमला सार्वजनिक भएपछि अस्ट्रेलियाका सबै विमानस्थलमा सुरक्षा व्यवस्था थप कडा बनाइएको छ । अस्ट्रेलियाको प्रहरीले विस्फोटक सामग्री प्रयोग गरी विमानलाई विस्फोटन गराउन लागिएको सूचनाका आधारमा गरिएको खोजीमा उक्त खतरनाक योजनाको पर्दाफास भएको जनाएको छ ।

प्रधानमन्त्री टर्नबुलले आतंकवादविरोधी कारबाहीअन्तर्गत उक्त योजना विफल बनाउन प्रहरी सफल भएको भन्दै अब विमानस्थलमा सुरक्षा व्यवस्था निकै कडा बनाइने जानकारी दिएका छन् । भारी हातहतियारले सुसज्जित प्रहरी र अस्ट्रेलियाको घरेलु गुप्तचर निकायका सदस्यहरूले सिड्नीका विभिन्न ठाउँमा छापा मारेर ती चारजनालाई पक्राउ गरेका थिए । उक्त सम्भावित आक्रमणको बारेमा भने प्रहरीले केही बताएको छैन । त्यसको जोखिम कत्तिको थियो एवं खसाल्न खोजिएको भनिएको उक्त विमान अन्तर्राष्ट्रिय उडनको थियो कि राष्ट्रिय उडान भन्ने बारेमा पनि स्पष्ट खुलासा गरिएको छैन । सिड्नी शहरका साथै विमानस्थलमा पनि थप सुरक्षा सतर्कता कायम गरिएको छ । त्यसैगरी देशका अरू विमानस्थल र भूभागमा पनि थप सुरक्षाकर्मी खटाइएको छ ।

प्रधानमन्त्री टर्नबुलले यात्रुहरूलाई धैर्य धारण गर्न आग्रह गरेका छन् । उनले आत्मविश्वासका साथ काम गर्न सबै सुरक्षाकर्मी र काममा जाने सबै नागरिकलाई पनि आग्रह गरेको बताइएको छ । अस्ट्रेलियामा यसअघि पनि आतंकवादी हमलाको प्रयास भएको बताइएको थियो । आतंकवादको हमलाको जोखिम रहेको भनी यसअघि पनि समाचार आएको बताइएको थियो । —रासस÷एएफपी