जुडोमा नेपाललाई दुई कांस्य

काठमाडौं : थाइल्यान्डमा जारी थाइल्यान्ड इन्टरनेसनल नर्थ बैंकक युनिभर्सिटी जुडो च्याम्पियनसिप-२०१७ मा नेपाली खेलाडी इन्द्रबहादुर श्रेष्ठ र उमेश मगरले कांस्य पदक प्राप्त गरेका छन् । इन्द्रले नौ राष्ट्रको सहभागिता रहेको ६६ केजी तौलसमूहमा फिलिपिन्सका मेरालेस नाथानिइललाई २.२० सेकेन्डमा वाजारी र इप्पोनमा पराजित गर्दै कांस्यपदक प्राप्त गर्न सफल भएको जानकारी प्रशिक्षक सूर्यनारायण श्रेष्ठले दिए ।

इन्द्र पहिलो चरणमा भने आयोजक थाइल्यान्डका फुयनसुक कवेतलाई १.२२ सेकेन्डमा वाजारी इपोन स्कोरमा पराजित गर्दै क्वार्टरफाइनल प्रवेश गरेका थिए । क्वार्टरफाइनलमा हङकङका खेलाडी चोइसिङ योङलाई वाजारी इप्पोनमा पराजित गरेका थिए । उनी सेमिफाइनलमा यूएईका ओक्सिवाई अलिखानसँग पूरा समय खेल्दै वाजारीको आधारमा पछि परेका थिए ।

यसैगरी ६० केजी तौलसमूहमा उमेशले क्यामरुनका खेलाडीसँग पराजित हुँदै कांस्य पदक जिते । उनी पहिलो चरणको खेलमा थाइल्यान्डका खेलाडी जाइवान कुराकोरनलाई वाजारी इप्पोनमा पराजित गर्दै क्वाटरफाइनल प्रवेश गरेका थिए । क्वाटरफाइनलमा भियतनामी खेलाडी न्गुयन होङसँग गोल्डेन स्कोरमा पराजित भएका उमेशले रिपाचेजमा थाई खेलाडीबाट वाकओभर पाएका थिए । यसैगरी महिला ५७ केजी तौलसमूहमा नेपालकी मनिता श्रेष्ठ प्रधान थाइल्यान्डकी खेलाडी वारासिहा युरिकोसँग इप्पोनमा पराजित भइन् ।

दक्षिण एसियाली खेलकुदकी स्वर्ण पदकधारी फुपूल्हामु खत्री भने पराजित भएकी छन् । महिला ६३ केजी तौलसमूहमा प्रतिस्पर्धा गरेकी फुपू आइतबार थाइल्यान्डकी खेलाडी सेनाथन ओरापिनसँग पूरा समय खेल्दै पराजित भइन् । अर्की नेपाली खेलाडी सुनिता ताम्राकार पनि ७० केजी तौलसमूहमा असफल भइन् । पहिलो चरणमा आयोजक राष्ट्रकी खेलाडी थाम्माफोरन अनोन्गनतलाई हराएर क्वार्टरफाइनलमा प्रवेश गरेकी सुनिता क्वार्टरफाइनलमा लाओसकी खेलाडी थिफाकोन सिहामोङसँग हारिन् । उनी कांस्य पदकका लागि भएको रिपाचेजमा भियतनामकी खेलाडी थ्रुओङ थी थानह थाउसँग पराजित भइन् ।