विमान दुर्घटनामा बचेका खेलाडी मैदानमा ओर्लन आतुर

रियो दी जेनेरियो : गत मंसिरमा भएको विमान दुर्घटनामा बाँच्न सफल भएका ब्राजिली फुटबलर एलन रस्चेल मैदानमा ओर्लन आतुर देखिएका छन् । गत मंसिर १४ गते ब्राजिली फुटबल क्लब चापाकोएन्सका खेलाडीसहित ८१ जना सवार विमान कोलम्बियाको मेडेलिन सहरनजिक दुर्घटना भएको थियो । दुर्घटनामा ६ जना यात्रुमात्रै बाँच्न सफल भएका थिए । तिनै ६ यात्रुमध्येका एक थिए, रक्षक एलान रस्चेल ।

उनी लामो समयसम्म उपचारमा थिए । उनी होसमै रहे पनि लामो समयसम्म टोलाएरै बसिरहन्थे । कसैसँग पनि कुरा गर्न नरुचाउने रस्चेललाई दुर्घटनाको त्रासबाट बाहिर निकाल्न उनकी पत्नी मरिना स्र्टोचीले अहम् भूमिका निर्वाह गरिन् । पत्नीको लामो र अथक प्रयासपछि रस्चेल यतिबेला दुर्घटनाको त्रासबाट बाहिर निस्किएका छन् । अकल्पनीय दुर्घटनाका साक्षी बनेका फुटबलर रस्चेल अहिले पुरानै कर्ममा फर्किएका छन् । लामो समयसम्म गुमनाम बनेका रस्चेल अहिले फुटबल मैदानमा फर्कने तयारीमा छन् ।

रस्चेल आठ महिनापछि स्पेनिस क्लब बार्सिलोनाविरुद्ध मैदानमा ओर्लने तयारीमा छन् । उनी अर्को महिना बार्सिलोनाविरुद्धको मैत्रीपूर्ण खेल खेल्न आतुर छन् । २७ वर्षीय रस्चेल पुरानै फर्ममा फर्कन हरेक दिन फुटबल मैदानमा पसिना बगाइरहेको अन्तर्राष्ट्रिय सञ्चारमाध्यमले जनाएका छन् । आठ महिनाअघिको बीभत्स घटनालाई बिर्सिएर चापाकोएन्सले नयाँ टोली तयार पारिसकेको छ । टिममा विमान दुर्घटनामा बाँचेका रस्चेलसँगै गोलरक्षक ज्याक्सन फोलम्यान र मार्कोस ड्यानिलो पनि चापाकोएन्समा आबद्ध भएका छन् ।

उक्त विमान दुर्घटनामा चापाकोएन्सले १९ जना खेलाडी र पूरै कोचिङ स्टाफ गुमाउनु परेको थियो । इन्धन सकिएर दुर्घटना भएको विमानमा २१ खेलाडी, २० भन्दा बढी पत्रकार, कोचिङ स्टाफ र अन्य यात्रु सवार थिए । दुर्घटनामा परेर पनि चापाकोएन्सका तीनजना खेलाडी, चालक दलका दुई सदस्य र एक पत्रकार बाँच्न सफल भएका थिए । चापाकोएन्स टोली एट्लेटिको नासिओनलसँग कोपा सुडामेरिकाना प्रतियोगिताको फाइनल खेल्न मेडिलिन जाँदै थियो । उक्त प्रतियोगिता दक्षिण अमेरिकाकै दोस्रो ठूलो क्लब प्रतियोगिता मानिन्छ ।

चापाकोएन्सले आगामी जुलाई ७ तारिखमा बार्सिलोनाको घरेलु मैदान नाउ क्याम्पमा मैत्रीपूर्ण खेल खेल्नेछ । जोआन ग्याम्पर ट्रफी नाम दिइएको मैत्रीपूर्ण खेलमा बार्सिलोनाले आफ्ना स्टार खेलाडीलाई नै मैदानमा उतार्ने सञ्चारमाध्यमले जनाएका छन् । चापाकोएन्सले शुक्रबार विज्ञप्ति निकाल्दै रस्चेलको पुनरागमन उनको स्वास्थ्य र क्लबको फुटबल टिम पुनर्निर्माणमा महत्वपूर्ण रहेको जनाएको छ । चापाकोएन्सले बार्सिलोनाजस्तो संसारकै चर्चित क्लबसँगको मैत्रीपूर्ण खेलले क्लबको पुनरागमनमा ठूलो सहयोग पुग्ने विश्वास गरिएको छ । चापाकोएन्स क्लबको स्थापना सन् १९७३ मा भएको थियो । ब्राजिलियन लिगमा यो क्लब नवौं स्थानमा छ ।