रुपन्देहीमा अपराधिक गतिविधि बढ्दै

भैरहवा : रुपन्देहीमा पछिल्ला वर्षहरुमा अपराधिक गतिविधिहरु बढ्दै गएका छन्। प्रहरीले जनाए अनुसार विगतका वर्षहरु भन्दा आर्थिक वर्ष ०७३/०७४ मा कर्तव्य ज्यान, ज्यान मार्ने उध्योग, लागूऔषध, जवर्जस्ती करणी, चोरी, सवारी दुर्घटना, आत्महत्या लगायतका घटनामा बृद्धि भएको छ।

आर्थिक बर्ष ०७३/०७४ मा प्रहरीले विभिन्न प्रकृतिका १ हजार ४ सय ६६ वटा मुद्दा दर्ता गरेर ९ सय ९२ वटा फछर्यौट गरेको जनाएको छ। आर्थिक बर्ष ०७३/०७४ मा कर्तव्य ज्यान सम्बन्धि २५ वटा मुद्दा दर्ता भएको रुपन्देही प्रहरी प्रमुख रविन्द्र धानुकले बताए । ०७२/०७३ मा यो संख्या १३ मात्र रहेको थियो । दर्ता भएका २५ वटा मुद्दा मध्ये ६ वटा फछर्यौट हुन बाँकी रहेको उनले बताए ।

यसैगरी जवरजस्ती करणीमा पनि दोब्बर मुद्दा दर्ता भएका छन्। आर्थिक बर्ष ०७२/०७३ मा २६ वटा मुद्दा दर्ता भएकोमा पछिल्लो बर्ष ४३ वटा मुद्दा दर्ता भएको प्रहरीको तथ्यांकले देखाउँछ । रुपन्देहीका प्रहरी प्रवक्ता प्रहरी नायब उपरीक्षक बेल बहादुर पाण्डेले रुपन्देहीमा जघन्य अपराधहरु बढ्दो क्रममा रहेको बताए। आर्थिक बर्ष ०७२/०७३ मा चोरीका ६० वटा मुद्दा दर्ता गरिएका छन । यस अघि यो संख्या ४९ मात्र रहेको थियो ।

यसै गरी पहिले १ वटा मात्र मुद्दा रहेको डाँका चोरी बढेर ३ वटा पुगेको छ। शुन्य रहेको बोक्सीको आरोप र जातीय छुवाछुतका १/१ वटा घटना पनि दर्ता भएका छन् । लागू औषध सम्बन्धि मुद्दाको अवस्था झनै भयावह हुँदै गएको छ। आर्थिक बर्ष ०७१/०७२ मा १ सय ९० र ०७२/०७३ मा ३ सय २८ वटा मुद्दा भएको लागू औषधको मुद्दा आर्थिक बर्ष ०७३/०७४ मा बढेर ३ सय ५१ वटा पुगेको प्रहरीले जनाएको छ।