दलित आन्दोलनका अगुवा रामको निधन

राजविराज : सिनो बहिष्कार र भूमिहीन हरुवा चरुवा आन्दोलनका अगुवा नेता बलदेव रामको ६७ वर्षको उमेरमा मंगलबार विहान सप्तरीको सुरुंगा नगरपालिका वडा नम्बर ४ मधुपट्टि कनकपुरस्थित घरमा निधन भएको छ ।
धरानस्थित बि.पी. कोइराला स्वास्थ्य विज्ञान प्रतिष्ठानमा उपचार गराई आइतबार घर फर्किएका मुटु रोगी रामको स्वास्थ्य अवस्था बिहान एकाएक बिग्रिएपछि अस्पताल लैजाने तयारी गर्दा गर्दै बिहान ६ बजे निधन भएको उहाँका छोरा गणेश रामले बताए । रामका श्रीमती, दुई छोरी र दुई छोरा छन् ।

सप्तरीको दौलतपुर गाविसमा २०५६ सालमा कथित दलितहरुले सिनो फाल्नै पर्ने सामाजिक बाध्यताका विरुद्ध आन्दोलनको अगुवाई गरेका रामले तराईका जिल्लामा सिनो फाल्नु पर्ने कुरितीजन्य प्रथाको अन्त्य गर्न अग्रणी भूमिका निर्वाहगरेका थिए । राष्ट्रिय भूमि अधिकार मञ्च, जनचेतना दलित संगम मधुपट्टि र हरुवा चरुवा अधिकार मञ्चको संस्थापक अध्यक्ष राम उच्च स्तरिय भुमिसुधार आयोग २०६५ को सदस्य समेत भएका थिए ।

भारतको दिल्लीमा २०६३ सालमा डाक्टर अम्बेडकर पुरस्कार पाएका रामलाई पछिल्लो पटक राष्ट्रिय मानवअधिकार आयोगले राष्ट्रिय मानवअधिकार आयोगको १७ औं वार्षिकोत्सवको अवसरमा ‘दयाराम परियार स्मृति मानवअधिकार सम्मान’ प्रदान गरेको थियो । त्यस्तै गत वर्ष साउन १६ गते २४औं प्रकाश स्मृति दिवसको अवसरमा बैद्य—प्रकाश मानव अधिकार पुरस्कार २०७३ बाट राम सम्मानित भएका थिए ।

राष्ट्रिय मानव अधिकार आयोगबाट २०५८ सालमा र राष्ट्रिय दलित आयोगको १३औं वार्षिकोत्सवको अवसरमा २०७१ सालमा सम्मानित रामले २०६१ मा टिकाराम मानव मर्यादा पुरस्कार, २०६२ मा जनउत्थान राष्ट्रिय पुरस्कार र समाज कल्याण परिषदद्वारा २०६९ मा सामाजिक सेवा पुरस्कार प्राप्त गरेका थिए ।