कुटनीतिज्ञलाई गृहमन्त्रीको जवाफ : प्रतिनिधिसभा र प्रदेशको चुनाव मंसिर भित्र
साउन १९, २०७४ बिहीबार १५:५१:०
काठमाडौ : गृहमन्त्री जनाद्र्धन शर्माले मंसिर भित्र प्रतिनिधिसभा र प्रदेश सभाको निर्वाचन गराउने योजना रहेको बताएका छन् । नेपालका लागि जापानी राजदूत मासासी ओगावालाई गृहमन्त्री शर्माले बिहिबार त्यस्तो जवाफ दिएका हुन ।
‘मौसमका कारण माघ ७ गते भन्दा पनि मंसिर भित्रै निर्वाचनहरु शान्तिपुर्ण तरिकाले सम्पन्न गर्ने योजना छ’ गृहमन्त्रालयमा बिहिबार भएको भेटमा गृहमन्त्री शर्माले राजदूत ओगावालाई भने । माघ ७ गते भित्र प्रतिनिधिसभा र प्रदेशसभाको निर्वाचन गराउनु पर्ने संम्बैधानिक व्यवस्था छ ।
जापानी राजदुत ओगावाले निर्वाचनका क्रममा १३ वटा मतदान केन्द्रहरुमा अवलोकन कार्यमा सहयोग गरेको जानकारी गराउदैँ आगामी तेस्रो चरणको स्थानीय, प्रदेश र प्रतिनिधि सभाका निर्वाचन पनि शान्तिपुर्ण तरिकाले सम्पन्न गराउन सुझाव दिएका थिए ।
जापानी राजदुत ओगावाले दोस्रो चरणको स्थानीय तहको निर्वाचन शान्तिपुर्ण ढंगले सम्पन्न गरेकोमा गृह मन्त्री शर्मालाई बधाई दिएका थिए ।
गृहमन्त्री शर्माले जापान सरकारले नेपालको आर्थिक विकासमा पु¥याएको योगदानको प्रसंसा गरेका थिए । गृहमन्त्री शर्माले जापान सरकारले नेपालमा विपद व्यवस्थापनमा गरेको उल्लेख्य सहयोगको उल्लेख गर्दै छिट्टै सो कार्यका लागि स्वयमसेवकहरु पनि तयार गर्ने जानकारी गराए ।
अब उद्धार कार्यमा स्थानीय जनतालाई समेत सहभागी गराउने योजना रहेको बताउदै गृहमन्त्री शर्माले त्यसमा पनि जापान सरकारले सहयोगी हात बढाउने अपेक्षा गरेको बताए ।
लुम्बिनीमा एउटा अन्तराष्ट्रिय विमानस्थल बनाएर जापानका बौद्ध धर्मावलम्बीहरुलाई आवागमन झनै सहज बनाउने सोच रहेको गृहमन्त्री शर्माले बताए ।
राजदुत ओगावाले नेपालमा जापानी कुटनितिज्ञ र जाइकाका कर्मचारी ढुक्ककासाथ बसेको र भविष्यमा पनि उनीहरुका लागि यस्तै सुरक्षा अवस्थाको अपेक्षा गरेको बताए । यस विषयका मन्त्री शर्माले नेपालले पाहुनाहरुको सुरक्षाका विषयमा विश्वस्थ रहन् आग्रह गर्दै, थप सुरक्षा आवश्यक परे त्यसको पनि व्यवस्था गर्ने बताए । जापानी राजदुतले बर्षेनी करिब २० हजार जापानी पर्यटहरु भ्रमणका लागि नेपाल आउने गरेको जानकारी गराएका थिए ।
प्रतिक्रिया दिनुहोस !
