बम समातेर फाल्ने असई सम्मानित
काठमाडौँ: पूर्व नेपाल प्रहरी परिवार मञ्च बेलायतले स्थानीय तहको निर्वाचनका क्रममा निर्वाचन स्थलतर्फ आइरहेको बमलाई हातले समातेर फ्याँक्ने प्रहरी सहायक निरीक्षक दुर्गाबहादुर रानालाई सम्मान गरेको छ।
मञ्चले प्रहरी प्रधान कार्यालयमा विहीबार एक कार्यक्रमको आयोजना गरी उनलाई नगद रु ५१ हजार तथा प्रमाणपत्रद्वारा सम्मान गरे। मञ्चका सल्लाहकार एवं नेपाल प्रहरीका पूर्वप्रहरी नायब उपरीक्षक शिवजी श्रेष्ठले उनलाई सम्मान गरेको हो।
सो अवसरमा प्रहरी महानिरीक्षक प्रकाश अर्यालले प्रवासको बसाइँको बाबजुद पनि नेपाल प्रहरी संगठन र यसमा आबद्ध कर्मचारीप्रतिको भावनात्मक सानिध्यताका लागि आफ्नो स्थानबाट दिएको योगदान सराहनीय रहेको बताए।
उनले प्रहरी सहायक निरीक्षक रानाको अदम्य साहसले नेपाल प्रहरीका सदस्यको वीरता र कर्तव्यपरायणतालाई पुनः एकपटक इतिहासमा कहिल्यै नमेटिने गरी अंकित गरेको छ उनले भने।
मञ्चका सल्लाहकार श्रेष्ठले प्रहरी सहायक निरीक्षक रानाले आफ्नो बहादुरी प्रदर्शन गरी ठूलो जनधनको क्षति हुनबाट जोगाइ प्रहरी कर्मचारीको मात्र नभई पूर्वप्रहरी कर्मचारीलाई समेत गौरवान्वित बनाएको बताउँदै आगामी दिनमा पनि प्रहरी संगठनको हित उन्नतिका लागि मञ्चले सहयोग गर्ने प्रतिबद्धता व्यक्त गरे।
दोस्रो चरणको स्थानीय तह निर्वाचनका क्रममा दाङको तुल्सीपुर उपमहानगरपालिका-३ स्थित श्री प्रतापपुर अम्बास आवासीय विद्यालयस्थित मतदान केन्द्रमा खटिएका रानाले अज्ञात व्यक्तिले प्रहार गरेको बम तत्कालै टिपेर फाल्दा केही पर खोल्सामा पुगेर बिष्फोट भई निष्क्रिय भएको थियो। रासस
प्रतिक्रिया दिनुहोस !
