प्रशिक्षणमा सहभागी खेलाडीहरु सम्मानित
राजविराजः नेपालमा आयोजना हुने १३औँ दक्षिण एसियाली खेलकुद प्रतियोगिता(साग) को प्रशिक्षणमा छनौट भएका सप्तरीका खेलाडीहरुलाई शुक्रबार राजविराजमा सम्मान गरिएको छ।
मैथिली चलचित्रका नायक करन शर्माद्वारा आयोजित सम्मान कार्यक्रममा भारोत्तोलन खेलाडीहरु राजविराज ६ का मनोजकुमार यादव र विष्णुपुर गाउँपालिका ७ का रामकुमार यादव सम्मानित भएका हुन। पूर्वाञ्चलमा सम्पन्न सातौ राष्ट्रिय खेलकुदमा मनोजले स्वर्ण पदक प्राप्त गरेका थिए भने रामकुमार युथ तथा जुनियर एशियन भारोत्तोलन च्याम्पियनसीप २०१७ मा सहभागी थिए।
जिल्ला खेलकुद विकास समितिमा आयोजित कार्यक्रममा समितिका उपाध्यक्ष धिरेन्द्र वर्मा, जिल्ला भारोत्तोलन संघका अध्यक्ष महेश यादव र नायक शर्माले खेलाडीलाई अबिर, माला र खादा ओढाएर सम्मान गरे। प्रशिक्षणमा सहभागी भारोत्तोलन खेलाडी सप्तरीको शमभुनाथकी शान्ति चौधरी भने अनुपस्थित रहिन।
प्रतिक्रिया दिनुहोस !
