नुवाकोट : चीनले रसुवागढी नाकाबाट नेपालतर्फ भित्रिने सामानमा भन्सार क्लियरेन्स शुल्क घटाएपछि आयात सुचारु भएको छ । साउन १ गते चिनियाँ पक्षले क्लियरेन्स शुल्क वृद्धि गरेपछि व्यापारीले सामान आयात ठप्प बनाएका थिए । यसअघि नेपाली व्यापारीले प्रतिगाडी एक हजारदेखि १५ सय आरएमबीसम्म तिर्दै आएकामा चिनियाँ भन्सारले एकै पटक पाँच हजार आरएमबी पुर्याएपछि आयात ठप्प बनेको थियो । आयात ठप्प भएपछि नेपाली र चिनियाँ पक्षबीच वार्ता भई शुल्क घटाउने सहमति भएको हो ।
शुल्क घटाएपछि सामान आउन थालेको रसुवागढी भन्सार कार्यालयले जनाएको छ । यस अवधिमा आठ करोड भन्सार राजस्व नेपाललाई घाटा लागेको रसुवागढी भन्सार कार्यालयका प्रमुख केदार पनेरुले बताए ।
केरुङगमा स्थानीय भन्सार प्रतिनिधिले नेपालतर्फ निकासी हुने मालसामानको भन्सार क्लियरेन्स शुल्क अत्यधिक वृद्धि गरेपछि आयातमा ठप्प भएको पनेरुको भनाइ छ । चीनको केरुङमा जेलुंगका डेपुटी प्रमुख र भन्सार प्रतिनिधिसँग यस विषयमा छलफल भएको थियो ।
केरुङमा स्थानीय भन्सार प्रतिनिधिले मूल्य घटाएर सामान क्लियरेन्स गर्ने प्रतिबद्धता जनाएको छ । नेपालतर्फ निकासी हुने सामान बोकेका एउटा गाडीसँग केरुङगमा स्थानीय भन्सार प्रतिनिधिले एक हजार पाँच सय आरएमबी लिने गरेकामा तेब्बरभन्दा बढी लिन थालेपछि नेपाली व्यापारीलेत्यसको विरोधमा आयात ठप्प बनाएका थिए । रसुवागढी नाकाबाट तयारी पोसाक, विद्युतीय सामग्री, स्याउलगायतका सामान आयात भइरहेको छ ।
नेपाल ल्याउने सामानको भन्सार क्लियरेन्स शुल्क वढेपछि नेपाली व्यापारी चिन्तित भएको नुवाकोट उद्योग वाणिज्य संघका महासचिव दीपक कायस्थले वताउनुभयो । चीन प्रवेशका लागि पुरानो तातोपानी नाका वन्द भएपछि दुई वर्षदेखि रसुवागढी नाकामात्र सन्चालनमा रहेको छ ।
यस सम्वन्धमा रसुवाका प्रमुख जिल्ला अधिकारी चोमेन्द्र न्यौपानेको नेतृत्वमा चीनको जिलोङ काउन्टीका स्थानीय सुरक्षा अधिकारी कर्णेल गाओ हुइहाइलगायत भन्सार, क्वारेन्टाईन तथा अध्यागमनका अधिकारीसँग जिल्ला प्रशासन कार्यालय रसुवामा नेपाल र चीनका अधिकारीवीच रसुवाको धुन्चेमा सीमा सुरक्षा बैठक पनि गरिएको थियो ।
२५ सय आरएमबी घटाएपछि नेपाली व्यापारीले सामान आयात सुरु गरेका हुन् । सामान लिनका लागि चीन पुगेका कन्टेनरमध्ये तीन सय ९६ वटाको क्लियरेन्स गर्ने कार्य सुरु भएको छ । शुल्क आधा मात्र कम भएको र नेपाली व्यापारीले एकैचोटी शुल्क बुझाउन नसक्दा धेरै गाडी अहिले पनि केरूङमा नै रोकिएका छन् ।
शुल्क बुझाउने कन्टेनर नेपाल आउने क्रम शुरु भएको रसुवागढी भन्सारका प्रमुख भन्सार अधिकृत केदार पनेरुले जानकारी दिनुभयो । र चीनतर्फ भने मैदा, चाउचाउ, खुर्सानी, हस्तकलाका सामग्री निर्यात हुदै आएको छ ।
प्रतिक्रिया दिनुहोस !
