बाढीले चार काठेपुल बगायो, तीन घर विस्थापित

जाजरकोट : बाढीले जाजरकोटका विभिन्न खोलामा बनाइएका चारवटा काठेपुल बगाएको छ भने आधा दर्जन सडक अवरुद्ध भएका छन् । बिहीबार र शुक्रबार आएको बाढीले काठेपुल बगाउँदा आवतजावतमा समस्या परेको छ । त्रिवेणी नलगाड नगरपालिका ५ स्थित खोला तर्न बनाइएका काठेपुल बगाउँदा जुनी माविमा पढ्ने करिब डेढ सय बालबालिका विद्यालय जानबाट वञ्चित छन् ।

सिर्केखोलाको काठेपुल अविरल वर्षासँगै आएको बाढीले बगाएपछि त्रिवेणी नलगाड नगरपालिका ६ गर्छिनाका करिब ५५ जना बालबालिका जुनी मावि पढ्न जानआउन समस्या भएको स्थानीय देवीभक्त घर्ती मगरले जानकारी दिए ।

त्रिवेणी नलगाड नगरपालिका ६ स्थित हारेकाफल, लहरेखोला र छहरेखोलाका तीनवटा काठेपुल बिहीबार राति आएको बाढी र पहिरोले बताएको थियो । यसबाट वीरेन्द्र प्रावि भारगाउँ र गणेश प्रावि लबिसामा अध्ययनरत झन्डै ९५ जना बालबालिका विद्यालय जानबाट वञ्चित भएको शिक्षक रामबहादुर घर्तीले बताए ।

यहाँका बालबालिका वर्षौंदेखि काठेपुलबाट आवतजावत गर्दै आएका थिए । बाढीले काठेपुल बगाएपछि उनीहरूको पढाइ प्रभावित भएको स्थानीय तारा बुढाको भनाइ छ । जुनी मावि सिर्के जान करिब दुई घन्टाको ओरालो पार गर्नुपर्ने र बीचमा खोला तर्न आफूलाई समस्या भएको कक्षा ९ मा अध्ययनरत देवी सिंहले गुनासो गरिन् । पहिरोले जिल्लाका पाँचकाटिया, रग्दाभगवती, छेडालगायत सडक अवरुद्ध भएका छन् ।

यसैबीच त्रिवेणी नलगाड नगरपालिका ५ सिर्केस्थित जनकबहादुर सिंह, महेन्द्र शाही र प्रेम सिंहको घर बाढीको उच्च जाखिममा परेको छ । यसले ती परिवार विस्थापित भएका छन् । बिहीबार रातिदेखि परेको वर्षाका कारण आएको बाढीले सिंहको घरअघिको पर्खाल बगाएको छ । साथै महेन्द्र शाही र प्रेम सिंहको घर बाढीको उच्च जोखिममा रहेको जिल्ला प्रहरी कार्यालय जाजरकोटले जनाएको छ । उनीहरू सबै छिमेकीको घरमा शरण लिन बाध्य छन् । उनीहरूको घरवरपर करिब २५ रोपनी खेत बाढीले कटान गरेको प्रहरीले जनाएको छ ।

जिल्लाका विभिन्न खोलामा बाढी आएको र ठाउँठाउँमा पहिरो गए पनि घटनाबारे विस्तृत विवरण आइनसकेको निमित्त प्रमुख जिल्ला अधिकारी जनकप्रसाद शर्माले बताए ।